И йикъара Сулейман-Стальский райондин кьил Нариман Абдулмуталибов ва мергьяматлувилин кlвалахрик кьил кутазвай чи ватанэгьли Мамед Абасов Агъа Стlалрин мектебдин дарамат ремонт авунин гьаларихъ галаз таниш хьана. И гьакъиндай «Сулейман-Стальский район» МР-дин администрациядин пресс-къуллугъди хабар гузва.

Идалай вилик малумарнай хьи, РД-дин кьил В.Васильеван «100 мектеб» проектдин сергьятра аваз, Агъа Стlалрилай тир общественный деятель, карчи Мамед Абасова хайи хуьруьн мектеб ремонт авунин кlвалахар патал 2 миллион манат чара авун кьетlна.

Алай вахтунда мектебдин дараматдик пластикадин дакlарар кутунин кlвалахар кьилиз акъудзава. Гележегда ина мадни са жерге цlийивилер арадал къведа. Кlвалахар «Артем» ИП-ди кьиле тухузва.

Н.Абдулмуталибов ва М.Абасов мектебда ийизвай ремонтдин кlвалахрилай рази хьана. Мектеб ремонт авуник кьил кутунай райондин кьили М.Абасоваз рикlин сидкьидай чухсагъул малумарна.

Къейд ийин, Абасоврин хизанди ихьтин жумартвилер са шумудра къалурна. Райондин абадвал патал ватанэгьлийри чпин лайихлу пай кутазва.  «Монолитхолдинг» ООО-дин регьбер Разим Абасова Стlал Сулейманан кlвал-музей гуьнгуьна хтунин кlвалахар патал 1 миллион манат чара авунай.

«Лезги газет»