“Самур” журналдин нумра акъатнава. Ам Дагъустандин халкьдин писатель Абдуселим Исмаилован “ЧIехи барбатI­вилин 30 йис” макъаладилай гатIунза­ва. Авторди СССР чукIу­рай­да­лай инихъ уьлкведа арадал атай вакъиайриз ва исятда авай гьалариз къимет гузва.

Нумрада кьилин чка гьикаятдин паюни кьазва. Дагъустандин халкьдин шаир Арбен Къардашан “ВачIе — хваяр” роман давамарнава.

Публицист, писатель Нариман Ибрагьимован “Тапаррин къармахра” цIийи романдай кьилер гуз эгечIнава. И эсер ва ша­ир­ Шагьабудин Шабатова автор­дикай кхьенвай макъала писателдин 70 йисан юбилейдиз талукьарнава.

“Шиират” паюна Муьгъверган Алидин 150 йисан юбилейдиз та­лукьарнавай алим, литературовед Гьажи Гашарован макъала ва шаирдин шиирар, алай аямдин бажарагълу шаир, рикIе ашкъидин цIай куькIвенвай Зуль­фи­къар Къафланован цIийи эсерар, Аллагьяр Абдулгьалимован “Къугьдин эхиримжи мани…” тIвар алай баллада ганва.

Дагъустандин автономиядин 100 йисан юбилейдиз талукь яз СССР-дин Верховный Советдин депутат хьайи ва республикадин нафтIадин хел вилик тухуник еке пай кутур Велихан Шайдаевакай А.Исмаилован очерк чапнава.

Хъуьруьнрал рикI алайбурувай Шихмурад Агъакеримован “Акьуллу свас” къаравили кIелиз жеда.

Абад Азадов