И мукьвара Махачкъалада, Дагъус­тандин культурадин министерстводин актовый залда, Дагъустандин Гьукуматди тайинарнавай «Душа Дагестана» премия шад гьалара вахку­низ талукьарнавай мярекат кьиле фена. Виликан нумрада­ хабар гайи­вал, премиядин лауреат­рин арада Ахцегь райондин культурадин управленидин хиле зегьмет чIуг­вазвай Дагъустан Республикадин культурадин лайихлу къуллугъчи Таира Мус­пагьовани ава. Ам «Халкьдин мани» номинацияда гъалиб хьана.

РикIел хкин, 2012-йисалай тайинарнавай и премия Дагъустандин адетдин культура ва халкьдин яратмишунар хуьник ва вилик тухуник лайихлу пай кутунай гузва. Адахъ са шумуд («Халкьдин кьуьл», «Халкьдин мани», «Халкьдин те­атр», «Халкьдин музыкадин алат», «Жегьил бажарагъ» ва икI мад) номинация ава. Алатнавай йисара 172 кас адан лауреатар хьана. Абур вири культурадин хилез уьмуьр бахшнавай ла­йихлу ксар я.

— Чахъ «Душа России», «Душа Да­гес­тана» хьтин премияр хьуни сифте­ нубатда чи уьлкведин ва республикадин кьиле авай ксар тарих хуьнив, культурадин хилен месэлайрив жавабдарвилелди эгечIзавайди къалурзава. Къе и залда чи кьетIен культурадин ирс хуьзвай ксар кIватI хьанва. Куьн чи кьилин девлет я, — къейдна Зарема Бутае­вади.

Абуруз хьиз, министрди Республикадин халкьдин яратмишунрин кIвалин коллективдизни премия гун патал ла­йихлу ксарин кандидатураяр къалурунай муниципалитетрин ва культурадин управленидин регьберриз сагърай лагьана.

Таира Муспагьовади тамашачияр вичин 5 йис тамам хьайидалай инихъ шадарзава. Сифтедай Ахцегьрин 1-нумрадин СОШ-дин художественный самодеятельностдин коллективдик кваз, ахпани райондин культурадин управленидин хиле зегьмет чIугуналди. Ам республикадин ва районрин арада кьиле фейи са шумуд конкурсдин ва фестивалдин иштиракчи я. ГьакIни ам чи халкьдин, кьилди къачуртIа, «Мелодии и ритмы Лезгистана», «Лезги сес», «Пенкер баха», Кукваз Ражабан манийрин конкурсрин гъалибчи я.

Чи ватанэгьлиди райондин дишегьлийрин советдин председателвилин ве­зифаярни кьилиз акъудзава. Ам рай­соб­ранидин депутатни я. Дяведин махсус серенжем кьиле физвай чкайриз гуманитарный куьмек кIватIна рекье тунин активный кIвалахдай адаз РФ-дин оборонадин министерстводин патай Чухсагъулдин чар ганва.

Рагнеда  Рамалданова