Лезгийрин машгьур шаир, цIуд­ралди ктабрин автор Сажидин  Саидгьасанова  интернетдин куьмекдалди къецепатан уьлквейрин яратмишунардайбурун тешкилатрихъ, кьилдин писателрихъ галаз дуствилин ала­къаяр хуьзвайдакай чна “Лезги газетдин” алай йисан мартдин вацра акъатай нумрайрикай са­да хабар ганай. Шаирди и кIва­лах алай вахтундани давамарзава ва и карди бегьерлу нетижаярни гузва.

Мукьвара Сажидин Саидгьа­санов Кеферпатан Америкадин писателрин союздин “Ни дня без строчки” лишандик кваз тешкилнавай эдебиятдин Ю.К.Олешан тIварунихъ галай международный премиядин 2-дережадин дипломдиз лайихлу хьана. Къейд ийин хьи, адаз и диплом Мол­да­виядин шаир Григорий Гач­кевича урус чIалаз элкъуьрай лезги кIелзавайдаз фадлай таниш тир “НуькI хала” шиирдай ганва.

Кеферпатан Америкадин писателрин Союз США-да, Канадада, Мексикада ва къецепатан ма­са уьлквейра яшамиш жезвай, чпи урус чIалал яратмишзавай авторри арадал гъанвай эдебиятдин теш­килат я. Ам, машгьур шаирар тир Римма Казаковадин, Евгений Евтушенкодин ва Геннадий Нордан алахъунар себеб яз, 2003-йисуз Канадада кардик акатна. Тешкилатди интернетдин майданра урус чIалал кхьизвай авторар сад авунин жигьетдай еке кIвалах кьиле тухузва.

Идалайни гъейри, Михаил Ананова урус чIалаз элкъуьрнавай С.Саидгьасанован “Куьн гьикI ятIа, балаяр” шиир Виридуьньядин шаиррин Союзди Италияда акъуднавай шииратдин антологияда гьатнава.

Къейд ийин хьи, ихтилат физ­вай ктабда жуьреба-жуьре чIала­рал кхьизвай 57 автордин эсерар ганва. Чна чи къелемдин дуст Сажидин Саидгьасановаз и агал­кьу­нар мубаракзава ва адахъ чандин сагъвал, яргъи уьмуьр хьа­на кIанзава.

Чи мухбир