И йикъара Россиядин ФСИН (Федеральная служба исполнения наказаний) Дагъустанда авай Управленида коллегиядин гегьенш заседание кьиле фена. Управленидин начальник, къенепатан къуллугъдин полковник Сергей Ролдугинан регьбервилик кваз кьиле фейи и серенжем алатай йисан нетижаяр кьуниз ва цIийи йис патал кар алай месэлаяр тайинаруниз талукьарнавай. Ана гьакIни Управленидин начальникдин заместителри, УИС-дин (уголовно-исполнительная система) идарайрин, иник акатзавай вири къуллугърин ва отделрин регьберри иштиракна.
Кьилин хилерай — идарайра къайда ва хатасузвал таъминаруниз, дустагънавайбур зегьметдив вердишаруниз (адаптация), рекъемрин технологияр уьмуьрдиз кечирмишуниз, инсандин ихтиярар хуьниз, тербиядин кIвалах тешкилуниз, дустагъда тунвай ксарин арада ихтиярар чIурунин вилик пад кьуниз талукь яз кьиле тухузвай кIвалахдиз къимет гана. ИкI, заседание ачухдайла, С. Ролдугина гьахъ-гьисабдин девирда УФСИН-дин кIвалах УИС-да цIийивилер тунихъ ва вилик эцигнавай макьсадар кьилиз акъудунихъ элкъуьрнавайди, гьар йикъан кIвалахда, къайдаяр хуьнин ва хатасузвал таъминарунин хьиз, дустагънавай ксарин яшайишдин адаптациядин ва дустагъдай экъечIайбур адетдин уьмуьр кьиле тухуниз гьазурунин месэлайриз талукьбур тирди къейдна. УФСИН-дин кьиле авайбуру, саналди кIвалахунин рекьер ва къайдаяр хъсанаруниз артух фикир гун яз, Россиядин МВД-дин, ФСБ-дин талукь подразделенийри, оперативный малуматар (информация) датIана сада-садав агакьаруналди, 2025-йисуз къанун-къайда хуьдай органриз 552 тахсиркарвал дуьздал акъудиз куьмекна, абурукай 271 заланбур ва лап заланбур тир. Идалайни гъейри, спецконтингентдин 103 тахсиркарвал кьилиз акъудуниз рехъ ганач. Дустагъра авайбуру къанунриз акси крар кьиле тухунин вилик пад кьуна.
Гуьгъуьнлай заседанидал Управленидин начальникдин заместителрин, УИС-дин идарайрин регьберрин докладрихъ яб акална. Кьилдин хилерай, гьа гьисабдай яз, дустагънавайбурун руьгьдинни ахлакьдин тербиялувал хкажун патал серенжемар кьиле тухузвай жемиятдинни диндин тешкилатри саналди ва сих алакъада аваз кIвалахунин месэлаяр веревирдна. Анал гьакIни къуллугъчийрин пешедин гьазурлухвал мадни хъсанарунин ва пешекарвал хкажунин месэлайрални фикир желбна. Гьар са месэладай гележегда санлай и къурулуш вилик тухунихъ ва адан менфятлувал хкажунихъ элкъуьрнавай тайин къарарар кьабулна.
Коллегиядин нетижаяр кьадайла, С. Ролдугина 2025-йисан къуллугъдин оперативный ва производстводинни майишатдин кIвалах кьилин хилерай хъсан хьанвайди, гьа са вахтунда адан менфятлувал хкажун патал мадни еке кIвалах тухун лазим тирди къейдна.
Эхирдай, адет хьанвайвал, къуллугъчийрин агалкьунар къейдна. ИкI, кIвалахда виниз тир пешекарвал къалурунай ва пешедиз вафалувиляй са шумуд касдиз махсус тIварар гана, бязибурув идарадин гьуьрметдин грамотаяр ва маса шабагьар вахкана.
Рагнеда Рамалданова
