Махачкъалада РД-дин информациядин ва печатдин Агентстводин коллегиядин заседание кьиле фена. Анал алатай йисан нетижаяр кьуна. Коллегиядин иштиракчийриз ва СМИ-рин векилриз РД-дин АГИП-дин информациядин сиясатдин ва пресс-къуллугъдин управленидин начальник Рашид Акавова тебрикдин гафар лагьана.
РД-дин информациядин ва печатдин Агентстводин регьбер Абдуразакь Жамалутдинова вичин рахунра къейдна хьи, 2023-йисан сифте паюна, 2022-йисан гьа и вахтунив гекъигайла, ведомстводик акатзавай сайтра ва телеграм-каналра гузвай материалрикай менфят къачунин кьадар гзаф хьана.
2023-йисуз авур кIвалахдин нетижайрикай ихтилатдайла, А.Жамалутдинова къейдна хьи, 2023-йисуз агентстводик акатзавай идарайра оптимизациядин кIвалах тухунин сад лагьай пай тамамарна. Милли чIаларал акъатзавай 13 издание РД-дин «Этномедиахолдинг» ГБУ-дик акатзава.
Шаз «Дагъустан» РГВК-дин дарамат бинедилай ремонтна. «Дагъустан» РИА-дин пресс-конференцияр тухудай майдан алай аямдин техникадалди таъминарна. Ихьтин серенжемар республикадин СМИ-рин маса идарайрани кьиле физва. Гьа гьисабдай яз — «Дагъустан» Этномедиахолдингда, «Дагъустан» издательстводин кIвале, «ЦIийи медиа вилик тухудай институт» АНО-да.
Агентстводин вилик акъвазнавай важиблу везифайрикай сад милли чIалар хуьнихъ галаз алакъалу я. Милли чIаларал 13 газет, журналар акъудунилай, теле ва радиопередачаяр гунилай гъейри, агентстводик акатзавай издательствойра алатай йисуз Дагъустандин халкьарин чIаларал 51 ктаб чапна. «Дагъустан» издательстводин кIвали милли чIаларал 6 ктаб акъудна.
Хийир Эмиров
