4-январдиз Дербентда мергьяматлувилин “ЛЕКИ” фондунин векилрин гуьруьш кьиле фена. Анал фондуни 2021-йисуз тамамарай кIвалахрин нетижаяр кьуна ва цIийи йисуз кьиле тухудай мярекатар веревирдна.
РикIел хкин, “ЛЕКИ” фонд арадал гъайидалай инихъ са шумуд йис алатнава. Тешкилатди асул гьисабдай мергьяматлувилин, медениятдин, образованидин, яшайишдин, спортдин ва маса хилерай Кьиблепатан Дагъустанда жуьреба-жуьре мярекатар кьиле тухузва.
Мисал яз, алатай йисуз фондуни агъадихъ галай серенжемар тешкилна: Докъузпара районда игьтияж авай хизанрин арада недай-хъвадай суьрсет пайна, “Лезги газетдин” редакциядихъ галаз санал Эминхуьре лезги чIалай олимпиада тухвана, Рамазандин вацра Москвада лезги халкьдин ифтардин межлис тешкилунин карда, “Стань донором — подари жизнь” серенжемда иштиракна, Кьиблепатан Дагъустанда вад лагьай сеферда районрин уртах субботник тешкилна, начагъ кьве аялдиз куьмек гун патал пулдин такьатар кIватIна, фондунин активист, алим, МФТИ-дин муаллим Азим Нуьгьова онлайн-конференция тухвана.
Спортдин рекьяй фондуни “Леки” велоклубдихъ галаз велоспортдай акъажунар, “Кьурагьрин къугъунар” лишандик кваз кьиле фейи турнир, лезги чемпионрихъ галаз мастер-классар ва маса мярекатар тешкилна.
Августдин вацра кесиб хизанрай тир аялриз мектебда герек къведай затIар маса къачуна, Къурбанд сувариз талукь серенжем кьиле тухвана, ашкъи авайбур патал “ХкатIиз ва храз” лишандик кваз пулсуз курс ахъайна, “Женгинин баркаллувал” паркуна къелемар цана ва жуьреба-жуьре маса мярекатра иштиракна.
Винидихъ къейднавай мярекатар фондунин активистри чара ийизвай пулдин такьатрихъ кьиле тухванва. Эгер квез “ЛЕКИ”-ди тешкилзавай мергьяматлувилин серенжемрик куь пайни кутаз кIанзаватIа, квевай фондунихъ галаз телефондин нумрадин 7967-777-73-20 ва я электронный почтадин адресдин info@fondleki.ru алакъадиз экъечIиз жеда.
2022-йисуз фондунин вилик цIийи крар, везифаяр акъвазнава. Кьиле тухудай мярекатрин арада лезги чIалайни химиядай олимпиадаяр, субботникар, спортдин акъажунар, образованидиз, медениятдиз талукь гуьруьшар ва мергьяматлувилин хейлин маса серенжемар ава. Къуй абур кьилиз акъудунин карда фондунин векилриз Аллагьди куьмек гурай!
Агьмед Магьмудов
