И йикъара Махачкъалада, «Дагъустан» РИА-дин майдандал, Федеральный монополийриз акси къуллугъдин Дагъустандин управлениди (УФАС) 2025-йисуз тамамарай кIвалахрин нетижаяр кьуниз талукь пресс-конференция кьиле фена. Идарадин кIвалахдикай тамам делилар Дагъустандин УФАС-дин регьбер Къаир Бабаева агакьарна. Асул фикир ада рехъ ганвай тахсиркарвилерал ва абурун нетижайрал желбна.
ИкI, малум хьайивал, алатнавай йисан вахтунда идаради, санлай къачурла, 100,7 миллион манатдин жермеяр илитIна, 301 къуллугъчи административный жавабдарвилиз чIугуна, 59 миллион манатдилай гзаф жермеяр кьилиз акъудна.
Виридалайни гзаф жермеяр – 40 миллион манатдилай гзаф – газдин сетрик экечIунин хиле рехъ ганвай тахсиркарвилериз талуь я. Электроэнергиядин хиле, кьилди къачуртIа, муьштеридив лазим тир еридин электроэнергия агакьар тавун себеб яз, шаз 30,2 миллион манатдин (2024-йисуз – 62 миллион манатдин) жермеяр илитIна.
Къ.Бабаева хабар гайивал, монополийриз акси законодательство чIурунин рекье алатай йисуз 79 арза гъилелай авуна. Нетижада базарда гьуьжетунин шартIар хуьнин гьакъиндай федеральный закон чIурунин лишанрай 10 дело къарагъарнава.
ГьакIни гьукумдин ва чкадин самоуправленидин органрив 7 сеферда тагькимарунар агакьарна, абурукай 4 кьилиз акъуднава. Тамамар тавунвай 3 дуьшуьшдиз талукь яз чкадин самоуправленидин органрин аксина монополийриз акси законодательство чIурунай силис башламишнава.
Алатай йисуз чеб машгъул тир кIвалахар Россиядин Федерациядин законодательстводин истемишунриз жаваб гузвайбур тушир государстводин ва муниципальный 5 кархана терг авунин гьакъиндай тIалабунар (иск) агакьарнава. Идарадин кьили хабар гайивал, монополийриз акси законодательство чIуруниз талукь Дагъустандин УФАС-дин саки вири къараррин тереф судри хуьзва.
Государстводин закупкайрин хиле алатай йисан вахтунда 1138 арзадиз килигна (гьар жуьре дережайрин закупкайриз талукь яз). Рехъ ганвай тахсиркарвилер арадай акъудун патал 620 предписание агакьарна. 386 арза бине авайбур ва 595 бине авачирбур яз гьисабнава.
Закупкайрин арзаяр гьазурдайла мукьвал-мукьвал рехъ гузвай гъалатIрик объектдин винел патан акунар къалур тавун акатзава. Закупкайра иштиракзавай терефри дуьз делилар къалур тавунин месэлани кар алайди яз амукьзава.
2025-йисуз Управленидиз намуслубур тушир таъминчийрин сиягьдик (РНП) тIварар кутунин гьакъиндай 182 арза атана. Месэла ахтармишайдалай кьулухъ РНП-дик 96 тешкилат кутунва, 86 кархана кутунал рази хьанач.
«Пудратчийрилай (таъминчийрилай), гьа виликдай хьиз, икьрарар кьилиз акъудуниз талукь яз чпел къачунвай мажбурнамаяр кьилиз акъудиз алакьзавач. Нетижада милли проектар тайинарнавай вахтунда уьмуьрдиз кечирмишиз агакьзавач, ишлемишиз тахьанвай пулдин такьатар элкъвена бюджетдиз рахкуруниз мажбур жезва, санлай къачурла, вилик эцигнавай месэлаяр кьилиз акъудиз жезвач», — къейдна Къ.Бабаева.
2025-йисуз Управлениди пландилай къерехдай тир 800 ахтармишун кьиле тухвана, абурун нетижада 1000-далай гзаф закупкаяр гъилелай авуна, 94 дуьшуьшда тагькимарна.
Жасмина Саидова
