Дагъустанда 102,3 МВт-дин гужлувал авай Дербентдин ракъинин электростанция (СЭС) ишлемишиз вахканва. «Ук Новая Энергия» ООО-ди эцигнавай и объект региондин гуьнгуьна хутаз жедай энергетикадин хиле виридалайни чIехиди хьана, гила ада Россиядин кьиблепатан сад тир энергокъурулушдиз электроэнергия агакьарунин кIвалах башламишнава.
Проект Дагъустандин Кьил Сергей Меликован ва инвестор тир компаниядин руководстводихъ галаз гегьенш майданра уьмуьрдиз кечирмишдай инвестпроектдиз талукь икьрардин сергьятра аваз кьилиз акъуднава. Эцигунрин кIвалахар тамамарун патал республикадин гьукуматди Дербентдивай 10 километрдин яргъа авай Авадан хуьруьн патавай 305 гектардин чилин участок инвестордив, тулкI тавуна, кирида вугана, гьакIни лазим тир къурулушрихъ галкIурунин карда куьмек гана.
Эцигунрин кIвалахар 2024-йисан октябрдиз башламишнай. И майдандал Россияда акъуднавай ва кьве патанбур тир ракъинин тахминан 190 агъзур кьул (панель) тайинарна, чилин кIаникай 800 километрдилай гзаф кабелрин линияр тухвана.
Сифтедай Дербентдин СЭС-дин гужлувал 100 МВт-диз барабар хьун ва адаз ийизвай инвестицийри 6,2-7 миллиард манат тешкилун лазим тир. Амма нетижада проектда къалурнавай гужлувал 102, 3 МВт-дал кьван артухарна, талукь яз – инвестициярни.
Пландин бинедаллаз электростанцияди йиса 160 кВт/сят электроэнергия гьасилда. Им Дагъустандин вири электростанцийри гьасилзавай электроэнергиядин санлай къачур кьадардин тахминан 3 процент тешкилзавай делил я. СЭС эцигуниз серфнавай инвестицийрин умуми кьадар 10,9 миллиард манатдив агакьна.
Эцигунрин кIвалахар къизгъин тир вахтунда объектдал кIвалахдин 200 чка арадал гъанвай. Алай вахтунда электростанциядал вини дережадин пешекарар тир 25 къуллугъчиди кIвалахзава.
Жасмина Саидова
