8-июлдиз Каспийск шегьерда чи баркаллу ватанэгьли, зурба пагьливан, алим ва камалэгьли, агъсакъал, Ахцегь, Каспийск, Дербент, Махачкъала шегьеррин сейли инсан Сулейман Абдурагьимович Эфендиев (1933-2020) эбеди рикIел хуьнин лишан яз, ам яшамиш хьайи кIвалерин цлал гранитдин кьул ачухна.
Мярекатда Каспийскдин мэр, генерал-майор Борис Гонцова, РД-дин милли сиясатдин ва диндин крарин рекьяй министр Энрик Муслимова, ОНФ-дин региональный исполкомдин сопредседатель Елена Павлюченкоди, ДГТУ-дин ректор Нурмегьамед Суракатова, РД-дин физкультурадинни спортдин министрдин заместитель Халитбег Махачева, РД-дин Халкьдин Собранидин депутат, азаддиз кьуршахар кьунай дуьньядин чемпион Мегьамедхан Арацилова, Ахцегьай кьиле райадминистрациядин кьилин заместитель Вадим Агъасиев аваз атанвай чIехи дестеди, шегьердин общественный тешкилатрин векилри ва рагьметлудан багърийри, ярар дустари, гьакI къуншийри иштиракна.
— Къенин митингдал икьван ксар кIватI хьуни Сулейман Абдурагьимовичаз халкьдин арада аваз хьайи чIехи гьуьрметдин гьакъиндай шагьидвалзава. Эхь, ам общество патал хъсан крарик кьил кутаз хьайи инсан, халис итимвилин, тешкилатчивилин чешне тир. Спортдин, илимдин, педагогвилин, гьакI мергьяматлувилин месэлайра вири кукIушар рагьметлуда вичин гьакъисагъ зегьметдалди къазанмишна,- къейдна Борис Гонцова.
— Гьакъикъатдани, пара рекьерай зурба кас хьайи Сулейман Эфендиева яргъи ва лайихлу уьмуьр кечирмишна. Вичин хайи йикъаз талукь эхиримжи юбилейдал, уьмуьрдал ашукь, еке энергиядин ва руьгьдиз жаван агъсакъалди мугьманар руьгьламишун, шадарун патал ацукьна кьуьлзавай. Гьуьрметлу чIехи хизандин кьил, лезги халкьдин ва вири Дагъустандин зурба ватанперес, ам халкьдин рикIе эбеди яз амукьда. Аллагьдин рагьметдик кваз хьурай, — лагьана Энрик Муслимова,
— Сулейман Абдурагьимович вири патарихъай бажарагъ авай инсан тир ва виридалайни гзаф адан алакьунар спортда, илимда ва педагогвилин хилера малум хьана. Мягькем руьгь-беден, жумарт рикI авай ада вичелай несилриз хъсан крар, чешнеяр пара туна, — алава хъувуна Нурмегьамед Суракатова.
Сулейман Эфендиеван тIвар-къамат эбеди авунай Ахцегь райондин руководстводин, райсобранидин ва вири районэгьлийрин патай Каспийск шегьердин администрациядиз чухсагъулдин гаф зегьметдин ветеран Алмас Шуаева лагьана.
Митингдал гьакI рагьметлудан къуншияр, дустар, багъриярни рахана. Рахунрилай гуьгъуьниз мярекатдин иштиракчийри игитдин шикил алай мармардин кьул ачухна.
Дашдемир Шерифалиев
