Гьуьрмет авун истемишна
США-да Россиядин векил А.Антонова къейд авурвал, Москвади Вашингтондивай са гьихьтин ятIани къуллугъар, куьмекар гуьзетзавач, амма нетижалу суьгьбетар авун патал гьуьрмет авун истемишзава. “Лента.ру” чешмеди хабар гузвайвал, ихьтин фикир векилди урус чIалал рахазвай США-дин студентриз малумарна.
Ада Женевада кьиле фейи саммитдал хьайи менфятлу ихтилатар уьмуьрдиз кечирмишуник умуд кутазва. “Чаз США-дин патай кьетIен къуллугърин, куьмекдин игьтияж авач, амма кьве терефдизни хийирлу рафтарвилер арадал гъун патал гьуьрметлувилелди эгечIун истемишзава”, — лагьана А.Антонова.
Йикъа са шумуд маска…
Садакай масадак акатдай азарар сагъардай духтур С.Русановади къейд авурвал, сагъламвал хуьн патал инсанди са юкъуз 5-7 маска ишлемишун герек я. Адан фикир “URA.RU” чешмеди раижзава. Духтурди ихтилатзавайвал, адан теклифдалди дустари гьар юкъуз 5-7 маска ишлемишзава. Ада маска гьар кьве сятдилай дегишурун хъсан яз гьисабзава. Эгер маска са шумуд сеферда ишлемишиз жедайди ятIа, ам мукьвал-мукьвал хъсандиз чуьхуьн чарасуз я.
“Маска алаз къекъуьни грипп, вирус ва маса инфекцияр акатунин мумкинвал тIимиларзава”, — алава хъувуна пешекарди.
Манийвал гунин къаст
Украинадин президент В.Зеленскийди Германиядин канцлер А.Меркелавай Россияди тухузвай “Северный поток-2” газопровод акъвазурун тIалабзава. Украинадин регьбердин пресс-секретарь С.Никифорован малуматдал асаслу яз, идакай “ТАСС” чешмеди хабар гузва.
“Зеленскийди “Северный поток-2” проект акъвазарун патал алахъдайдакай гьамиша лугьузва. Ада газ ахъайдалди, гьатта ахъаяйдалай кьулухъни манийвал гун давамардайвал я”, — лагьана Никифорова.
И проект сифтедай 2019-йисуз акьалтIарун лазим тир, амма Америкадин санкцияр себеб яз, са шумуд сеферда кьулухъ элкъуьруниз мажбур хьана. Алатай вацра РФ-дин Президент В.Путина малумарайвал, турбайрин кьвед лагьай хел 1-2 вацралай тухвана куьтягьда.
Муаллимди сир ачухна
Санкт-Петербургдин Петроградский райондин мектебдин муаллим Д.Федоровади химиядай виш баллдалди ЕГЭ вахкай ученикрин агалкьунрин сир ачухна. Идакай “Фонтанка” чешмеди хабар гузва.
“Чун мектебда анжах ЕГЭ-дал кьван аялриз чирвал гунал машгъул жезвач. Чун аялриз тайин предмет хъсандиз чириз алахъзава. И кар патал чаз гьам теориядин, гьамни тежрибадин хъсан мумкинвилер ава. Хъсандиз гьазур хьанвай жегьилри им-тигьандин кIвалахар са четинвални авачиз кхьизва”, — лагьана муаллимди. Ада алава хъувурвал, адан ученикрин арада, дикъетсузвал себеб яз, 99 балл къачурбурни ава.
Ягъунрик акатна
Америкадин аскерар Сириядин рагъэкъечIдай пата гуьлледик акатна. Идакай “Reuters” чешмедиз США-дин оборонадин министерстводин векилди малумарна.
Къейдзавайвал, арадал атай агьвалатдикди хасаратвилер хьайибур дуьздал акъуднавач. Гьа са вахтунда Сириядин “SANA” чешмеди США-дин базадин патав гвай газ гьялзавай “Коноко” заводда хъиткьинунар арадал атанвайдакай хабар гузва.
6-июлдиз пилот галачир аппаратри Иракда авай США-дин векилханадал гьужумнай.
Танкар маса къачуда
Польшадин оборонадин министерстводиз США-дивай 250 танк маса къачуз кIанзава. Идакай “Defense News” чешмеди хабар гана.
Савдадин умуми къимет 2,9 миллиард доллардилай артух жеда. Польшади идалай вилик Туьркиядивай пилот галачир Bayraktar TB2 аппаратар маса къачуда лагьанай.
Майдиз Америкадин “The NationaI Interest” журналди алай вахтунда дуьньяда виридалайни къудратлу кьуд танкунин тIвар кьунай: немсерин Ieopard 2 A7+, Америкадин M1 Abrams, Кьиблепатан Кореядин K2 BIack Panther ва Россиядин Т-14 “Армата”.
ВОЗ-ди зулуз тестикьарда
Коронавирусдиз акси Россиядин “Спутник V” вакцина ВОЗ-ди зулуз тестикьардайвал я. Идакай Россиядин инвестицийрин фондунин кьил К.Дмитриева ихтилатна. “Чна ВОЗ-ди зулуз вакцина регистрация авун вилив хуьзва”, — къейдна ада.
Алай вахтунда Россиядин вакцина дуьньядин 67 уьлкведи регистрация авунва. Россиядилай гъейри, и вакцина арадал гъизвай ва арадал гъунин гьазурвилер аквазвай уьлквейрик Венгрия, Бразилия, Белоруссия, Къазахстан, Словакия, Аргентина, Индия, Кьиблепатан Корея, Китай, Германия, Италия ва Египет акатзава.
«Лезги газет»
