Нариман  Къарибов,  къурушви Алибеган хва,  чи публицистикадизни шииратдиз алатай асирдин 70-йисара атана. Адани за санал гьеле 1962-йисуз кьиле фейи Дагъустандин жегьил писателрин совещанида иштиракна. Чи шиирриз а чIаван чIалан устадри — Ш.Э.Мурадова, М.Гьажиева, А.Саидова, Л.Нямета виниз тир къимет ганай. Кьведазни филологиядин факультетдиз гьахьун теклифнай. Гуьгъуьнлай адакай Азербайжандин госуниверситетдин журналистикадин, закай ДГУ-дин филологиядин факультетрин студентар хьанай.

А йисара армиядин жергейриз тухудай жегьилрикай кьитвал авай.  ГьикI хьи, дяведин йисарин аялрин кьадар лап тIимил тир. Гьавиляй вуз­рин студентризни Ватандин вилик буржи тамамариз эвер  гузвай. ИкI, Наримана СССР-динни Туьркиядин, за Ирандин сергьятрал погранзаставайра къуллугъна. КIелу­нар ас­кер­виляй хтайдалай кьулухъ куьтягьна.

Наримана гьа аскервиле амаз вич хъсан журналист тирди субутна. Вузда кIелуни адан пешекарвал мадни вини дережадиз акъудна.

Кьилин образование къачур же­гьилди, вичин хуьруьнвияр куьч хьанвай Хасавюрт райондин ЦIийи Къурушдал хтана, а чIаван колхоздин “Зегьметдин пайдах” газетдин, хуьруьн  радиодин  передачайрин редакторвал авуна.

ЧIехи  гимиди чIехи гьуьлерихъ ялда лугьудайвал, Н.Къарибовани чIе­хи газетрихъ, чIехи майданрихъ ял­на. Ада Хасавюрт, Избербаш, ах­п­а Дербент шегьеррин газетрин редакцийра кIвалахна. Гьа са вахтун­да­ республикадин вири чIехи га­зет­рихъ­ни журналрихъ галаз ала­къа хвена. Лап хъсандиз лезги, урус, азербайжан чIалар чизвай журналистдиз виринра регьят тир. Вичин везифаяр ада устадвилелди кьилиз акъудиз хьана.

90-йисара “Лезги газетдиз” Дербент шегьерда ва районда кIва­лах­дай хъсан журналист герек хьана. А къуллугъ — газетдин хсуси коррес­пондентвал Нариман Алибеговича та пенсиядиз экъечI­далди тамамарна. Газет и шегьерда ва районда  лезги гзаф хизанри кхьидайвал авуна. Вич лагьайтIа, гьакI Нариман ваъ — “Лезги газетдин”  Къагьриман тирди чирна! Адан зегьмет “Дагъус­тан Республикадин культурадин ла­йихлу работник” лагьай гьуьрметдин тIвар гуналди къейдна.

Н.Къарибов шаир язни  машгьур хьана. Хайи Къурушрикай, дагъларин тIебиатдикай, михьи  муь­­гьуьб­батдикай, зегьметчи игитрикай, Ватандиз вафалувиликай ада вишералди  хъсан шиирар, манияр, поэ­маяр, очеркар арадал гъана.

Алай вахтундани ам кхьинривай къерех хьанвач, галат тийиз, тес­ни­физ чIал, къелемдин женг да­вамар­зава. Адан макъалаяр, мажараяр, шикилар, шиирар авачир “Лезги газетдин” нумра тек-туьк акъатзава.

КIелзавайбурун гъиле ада кхьен­вай “Аманат”, “Зи ачух  рикI”, “Югъ нисинилай алатайла”, “Дурнайрин мани”, “Хайи чилин чимивал”, “75-гатфар”, “Чахъ  авай сад” (лезги чIалал) ва урус чIалал “Пробуждение” (“Уях хьун”)  ктабар ава. Абур гьакъикъатдани шаирди ва журналистди несилриз багъишнавай аманатар я.

Шаирди гзаф цIарар вичин ярдиз бахшнава:

Зи манидин эвелни вун я, эхирни.

Вун цуьк хьухь, ви билбил жеда зун.

СархушайтIа ви ашкъидин чехирди,

Тек са ваз хъуьреда, шеда зун.

ЧIаларин хазина я зи рикI,

Шиирар везиндал гъидай ваз.

Хошкъедем, цуькверин я вун цуьк,

И кардин мана тек чида заз…

 

Хайи хуьруькай ада кхьизва:

Зи хуьруьн рехъ — шуькIуь жигъир девирдин,

Жедач завай вун рикIелай алудиз.

Куьз лагьайтIа, чIехи рекьел уьмуьрдин

Масада ваъ, гьа вуна зун акъудна…

Эхь, ам вичин чIехи рекье ава. Яшар самбар хьайилани, галатун хиве кьазвач. И кар чна адаз тебрикни ийизва.

* * *

И йикъара чи къелемдин стхади вичин 80 йисан гатфар  къаршиламишда. Чна рикIин сидкьидай адаз и вакъиа тебрикзава:

Вилик мадни майданар ква —

Гьерекат, дуст, гьерекат!

Мелни мехъер, мизанар ква —

Гурлу я гьар мярекат.

 

Лекьрез садран жедач усал

Кичен кьилин аршар чи.

Селди, вацIу къачурай къал,

Гьисаб тежез яшар чи!..

 

Европадин чIере Къуруш —

Ажеб хуш я таъсибдиз!

Гьа кьакьанвал хьурай ваз нуш,

И кьисмет жеч кесибди…

“Лезги  газетдин” редакциядин коллектив.

_________________________________________

Шаирдин эсерар чи сайтда и ссылкадай кIелиз жеда.