Сулейман-Стальский райондин Кьасумхуьрелай тир Гьажимирзоева Наргиза мектеб куьтягьиз мукьва жердавай вичин гележегдин пешедикай фикирар гзаф ийизвай. Муаллимривай классдин руководителривай, диде-бубадивай хабарар кьазвай. Диде Наидадивай адаз духтурвал виридаз герек пеше тирди, амма са гьихьтин ятIани себебарни манийвилер хьуникди вичивай а пеше къачуз тахьайди, ам кьилиз акъат тавур мурад яз рикIе амайди ван хьанай. И гафари Наргизаз лап дериндай таъсирнай.
— Ам заз ганвай тапшуругъ хьурай, диде, за кьилиз акъудда ви мурад, — хиве кьунай ада вичин дидедиз.
Гьа икI, Кьасумхуьруьн 1-нумрадин СтIал Сулейманан тIварунихъ галай юкьван мектеб лап хъсан чирвилер аваз куьтягьай 1992-йисуз Наргиза документар Дагъустандин медицинадин академиядиз гана. Имтигьанар гатIундалди химиядай, биологиядай, урус чIалай ва литературадай ктабар гъиляй вегьенач. РикIе лагьайтIа, вичи дидедиз ганвай гаф авай эхир. Алахъунри чпин нетижаярни арадал гъана. Имтигьанар Наргиза, сад-садан гуьгъуьналлаз, лап хъсан къиметар къачуналди, вири кьудни вичин кьилелди вахкана.
Наргизакай медакадемиядин терапевтвилин факультетдин студентка хьана. Гьа сифте йикъалай Наргиз тарсарив рикI гваз эгечIна, лекцийрилай гуьгъуьниз библиотекада артухан литература кIелиз, журналрайни, газетрай конспектар кхьиз, абур чириз гзаф вахт акъудна. Теориядин ва тежриба чирдай тарсара ада активвал къалуриз хьана. Общественный кIвалахарни хиве авайтIани, Наргиза тарсариз кьецI ганач.
Гьа икI, студентвилин йисар акуна — такуна акъатна. 1998-йисуз Н.Гьажимирзоевади медакадемия яру диплом къачуналди акьалтIарна. Дидедиз, бубадиз, мукьвабуруз, тарсар гайи муаллимриз тежер кьадар шад хьана. Са тIимил ял яна, Наргиз кIвалахдин суракьда хьана. Дерин чирвилерни яру диплом гъилевай пешекар — терапевт хтанвайдакай райондин больницадин кьилевайбурузни малум хьана. 1999-йисалай Наргиз Аслановна ина поликлиникадин врач-терапевт я. Вичин везифайрив ам намуслудаказ эгечIзава. Вахт-вахтунда кефсузбур кьабулзава, абурун гьал ахтармишзава, диагноз эцигиз, ширин мецелди гъавурдик кутазва. Наргиз духтурдин тIвар ина сейли я, больницадин еке коллективда адаз гьуьрмет, авторитет ава. Наргиз Аслановна сад лагьай категориядин врач-терапевт, военкоматдин призывникар ахтармишдай комиссиядин членни я. И йикъара ада хейлин жегьилрин сагъламвал ахтармишна. Чи мурад Наргиз Аслановнадихъ мадни еке агалкьунар хьун я.
Райсудин Набиев
