31-августдиз Махачкъалада Дагъустандин Кьилин везифаяр вахтуналди тамамарзавай Сергей Меликован регьбервилик кваз совещание кьиле фена. Адан сергьятра аваз рес­публикадин алай йисан бюджетдиз талукь тапшуругъар кьилиз акъудзавай гьал, милли проектар ва 2022-2024-йисарин бюджетдиз талукь месэлаяр веревирдна. Идакай “Лезги газетдиз” РД-дин Кьилин пресс-къуллугъди хабар гана.

Сергей Меликован гафаралди, бюджет кьабулунин жигьетдай тухузвай кIвалах сагъ са коллективдин зегьмет я. Ам арадал гъидайла, яшайишдин вири хилер фикирда кьазва. Иник гьакIни инвестицийрин программайра иштиракунни акатзава. Республикадин Кьили гуьгъуьнлай къвезвай йисарин бюджетдик гатун вахтунда аялри ял ядай ва сагъламвал мягькемардай идараяр эцигун кутунин игьтияж авайди къейдна.

Бюджет арадал гъидайла, гзаф месэлаяр хъендик кумукьзавайди С.Меликова миса­лар гъуналди тестикьарна. Кьилди къачур­тIа,­ ам Бабаюрт райондин Львовский хуьре авай мектебдал акъвазна. Ада гьисабзавайвал, ихьтин объектар цIийикIа туьхкIуьр хъувуниз виликамаз пулдин такьатар чара авуна кIанзава. “Къе 31-август я. Пака аялар кIе­лиз гьиниз фидатIа, вучиз чна къе гьялзава? Майдин вацра бюджетдик дегишвилер кухтадайла, вучиз и мектеб патал пулдин такьатар чара авунач?”, — суал гана региондин Кьили исполнительный гьукумдин органрин регьберриз.

С.Меликова Табасаран райондин Ничрас хуьре авай мектебни рикIел хкана. Мектеб­дин­ да­рамат эцигун патал муниципалитетди 2015-йисан сентябрдин вацра икьрардал къул чIу­гун­ва. Райондин администрациядин бюджетда бес кьадар такьатар авачирвиляй эци­гу­­нар­ 2019-йисалди давамарун фикирдиз къа­­чу­на. Эвел кьиляй туькIуьрнавай проект­динни смета­дин документацияда 50 миллион­ манат пул къа­лурнавай, амма такьатар ава­чир­виляй­ гуьгъуьнлай 34 миллион манатдал кьван тIи­­ми­лар­на. И кардихъ галаз ала­къалу яз, про­­е­ктдай­ мектебдин гьа­ят авадан авун, кана­лиза­ция кардик кутун ва са жерге ма­са крар михьиз­ акъудна. Райондин администрацияди и месэла гьялна акьалтIарун патал республикадин Гьукуматдивай куьмек тIалаб­на. Электронный аукциондихъ галаз алакъа­лу са кьадар серен­жемар себеб яз, алай йи­сан 27-августдиз цIийи икьрар кутIун­на­.

Сергей Меликова и месэладин пата­хъай жавабдар ксариз талукь яз вичин наразивал­ къалурна ва РД-дин прокурордин сад лагьай­ заместитель Руслан Ляпинал Табасаран районда эцигзавай мектебдин гьакъиндай ахтармишунар кьиле тухун тапшурмишна. Дагъус­тандин сад лагьай ваце-премьер Нуьсрет Омароваз мектеб эцигунин кIва­лахар хсуси гуьзчивилик кутунин буйругъ гана.

Гуьгъуьнлай республикадин бюджетда къалурнавай тапшуругъар кьилиз акъудунин жи­гьетдай 1-августдиз авай делилрикай Нуьс­рет Омарова доклад авуна.

Чи мухбир