Урусатдин армиядин жергейра Дербент райондай хейлин жегьилри къуллугъзава. Абуру чпин пак буржи намуслувилелди кьилиз акъудзава. Идан гьакъиндай аскеррин диде-бубайриз ва военный комиссариатдин отделдиз частарин командиррилай хквезвай разивилин чарари ачухдиз шагьидвалзава.
И йикъара зал зи дуст, ахнигви Несред гьалтна. Жузун-качузунар авуна, сада-садаз дуьньяда, хуьре авай хабарар ахъайна, хъфидайла, ада зун акъвазарна, вичин хтул Алиев Фаргьад Эмирович армиядай хтанвайдакай ва адаз намуслувилелди къуллугъ авунай командованидин патай грамота, адан диде-бубадин тlварцlихъ чухсагъулдин чар ракъурнавайдакай хабар гана.
И ийкъара зун Фаргьад Акаевахъ галаз мукьувай таниш хьана. Малум хьайивал, ада 9-класс Агълаб хуьруьн юкьван школада акьатlарна, Белиж поселокда кардик квай хуьруьн майишатдин колледжда тракторист-машиниствилин пешекарвал къачуна. Ахпа Дербентдин военкоматдай ам къуллугъ ийиз Москва шегьердин къвалав гвай Одинцово шегьердиз рекье туна.
Шад жедай кар ам я хьи, къуллугъдин вахтунда аскервилин кьетIен лайихлувилерай, пешекарвилин вини дережадай, юлдашриз чешне къалурунай, гвардиядин танкарин сад лагьай армияда туьнбуьгь авачиз къуллугъ авунай грамота ганвай хцин диде-бубадин тIварцIелни чухсагъулдин чар рахкурнава. Ана кхьенва:
“Гьуьрметлу Замира Несредовна ва Эмир Нурмегьамедович! Квез кхьизвайди, куь хва Алиев Фаргьад Эмировича къуллугъ ийизвай гвардиядин 1-танкарин армиядин командующий я. Къуллугъ ийизвай вахтунда Фаргьада агалкьунривди военный пешекарвал чирна, адакай кар чидай устад хьана ва ада военный рекьяй чирвилерихъ ялна. Женгинин гьазурвилин нормативар кьилиз акъудунин карда ада лап хъсан ва виниз тир нетижаяр къалурна, датIана спортдал машгъул хьана. Къуллугъдин везифаяр ада гьамиша баркаллувилелди тамамарна, гьавиляй ам тарифдин чараризни лайихлу хьана.
Командиррихъ ва чlехи юлдашрихъ, вичихъ галаз санал къуллугъзавай аскеррихъ галаз гьуьрметлувилелди, лазим тир къайда хвена, вичин лайихвал агъуз тавуна алакъада хьана, коллективда вичизни гьуьрмет къазанмишна.
Вири командованидин ва гьакlни кьилди жуван патай хциз лайихлу тербия гана, адакай Ватан хуьдай халис инсан чIехи авур квез пара сагърай лугьуз кlанзава, квевай куь хцел дамах ийиз жеда.
Квез мягькем тир сагъвал гурай! Умудзава, куь хцин агалкьунри квез уьмуьрда зурба къуват гуда.
Гьуьрметдивди, генерал-лейтенант С. Кисель, гвардиядин танкарин 10-армиядин командующий”.
Сагърай чи кьегьал рухваяр!
Къагьриман Ибрагьимов
