Дагъустандин Гьукуматдин Председателдин заместитель Нариман Абдулмуталибов ва РД-дин хуьруьн майишатдин ва недай суьрсетдин министр Мухтарбий Аджеков  6-августдиз  Мегьарамдхуьруьн районда авай «ПОШ» ООО-дин кIвалахдихъ галазни таниш хьана. Ам емишар ва майваяр гьялунал, Enjoy Food («ТIуьникай лезет къачу») тIвар алаз  метягь акъудунал машгъул жегьил кархана я. Ада кьурурнавай помидорар, хутар, бадамжанар ва некьияр – са вацра тахминан 80 агъзур шартIунин банка метягь гьазурзава.  Карханадин планрик гьакIни емишрикай ва майвайрикай «чипсар» гьазуриз башламишун ква. 

Суьрсет Россиядин центральный регионрин алишверишдин зурба сетриз маса гузва. Карханадихъ Дагъустандин къенепата гузвай метягьдин кьадар артухардай, гьакIни ам Сибирдин регионриз рекье твадай планар ава. Производстводин кьетIенвилерикай сад ам я хьи, «ПОШ» ООО-ди емишар ва майваяр  чкадин суьрсет гьасилзавайбурувай маса къачузва. Идалайни гъейри, заводди анжах ватанда акъудзавай къапар, этикеткаяр ва маса шейэр ишлемишзава.

Карханадин кIвалахдиз баянар гудайла,­ Н.Абдулмуталибова адан кьетIенвал ва идара ийидай кадрийрин пешекарвилин виниз тир дережа къейдна. Ада хабар гайивал, Россиядин вири мулкунал ихьтин анжах кьве завод ала: сад — Астраханда ва кьвед лагьайди Мегьарамдхуьруьн районда­.

«Чун адаз гележегда производство гегьеншарун патал государстводин патай куьмек гунин мумкинвилериз килигда», — лагьана вице-премьерди.

Чи мухбир