Китайдин календардал амал авуртIа, 2020-йис 25-январдилай 2021-йисан 11-февралдалди давам жеда. Ам Лацу Металлдин Гьамбардин кьифрен лишандик кваз фида.  Китайдин горос­копда Гьамбардин кьиф сад лагьай гьайван я. Гьавиляй ам виридалайни гьуьрмет­ авуна кIанзавай лишан язни гьисабзава.

2020-йисан къуват, такьат (стихия)  ­ла­цу мягькем металл, амни къаст, женг,  мягь­кемвал, жуьрэтлувал лагьай чIал я. ГьакIни гьахълувал патал женг чIугунин лишанни я. Лацу рангуни михьивал, камаллувал, рикIин ачухвал, къени ерияр ва тамамвал къалурзава. Малум тирвал, и кьиф амалдар, секин, зигьинлу ва вили­камаз кьатIундай еке гьисс авай вагьши я. Гьавиляй алукьзавай йисни уьмуьрдин вири хилера хъсанди хьун гуьзетзава.

Гьелбетда, вири месэлаяр, суьгьуьрчидин тIвал галукьай хьиз, гьасятда ва ре­гьятдиз гьялиз жедач. Хъсан нетижадин иеси хьун патал са тIимил алахъни авуна, зегьметни чIугуна, хсуси къуватар, алакьунарни желбна кIанда. ГьикI ла­гьай­т­Iа, Гьамбардин кьифре хизандин ивирриз, адетриз, девлетриз гьуьрмет ийизва. Ада зодиакдин гзаф лишанриз (знакриз) кIанивилин галайвилер ийида, хизан уьмуьрда кьилин метлеб тирдан гъавурда тваз куьмекда. Мадни къейд ийизва хьи, Гьамбардин кьифрен йисуз хайи инсанарни регьимлу, фад акахьдай, лап му­ракаб месэлаярни регьятдиз гьялиз жедай ксар я. И рекьяй гзаф инсанриз чпин хъилер алуддай, дустарихъ, танишрихъ галаз баришугъ хъжедай мумкинвални жеда.

Идахъ галаз сад хьиз, цIи гзафбуруз халисан дустар жагъида, хейлинбуру карчивилин, амадагвилин алакъаяр тайинарда, тестикьарда. Ихьтин алакъайри гележегдин краризни къуват гуда.

Лугьузвайвал, Гьамбардин кьифрен йисуз хайи инсанриз цIийивилерихъ калтугиз хуш я. Абуруз уьмуьрда жезвай дегишвилерикайни къурху жедач. Абуру чирвилерихъ еримишда, чпин пешекарвилин дережаяр хкаждай алахъунар ийи­да, цIийи-цIийи чкайриз сейрда, са четинвални авачиз, хуш тушир кIвалах гадарна­, маса кар жагъурда. Эгер ихьтин кар ийидай фикир рикIе гьатнаваз хьайитIа, ам гатфарин, гатун варцара кьилиз акъудун лазим я. Гуьгъуьнлай кIвалах дегишариз хьайитIа, адахъ хъсан нетижаяр жедач.

Инсанри гьамиша хъсан крарик, ва­къи­айрик умудар кутазва, куьгьне йисуз хьайи перишан, татугай крар рикIелай алу­диз чалишмишвалзава.  Гьар сеферда ЦIийи йис алукьдайла, ам гьихьтинди жедатIа лугьуз фикирзава ва Аллагьдивай мурадар кьилиз акъатун тIа­лаб­­зава.  Ийидай, гъиле кьадай крар тайи­нарзава. ЦIийи йисавай рикI шадардай са вуч ятIани гуьзетзава. Лугьузвайвал, 2020-йисуз инсанриз, пуларихъ галаз ала­къалу месэлаяр гьялдайла, тади къачун тавун, фикир-хиял авун тек­­лифзава. Та­хьайтIа, кIеве гьатунни мумкин я. Гьамбар­дин кьифре гьакъисагъвилелди, намуслувилелди зегьмет чIуг­ваз­­вай ва са вуч ятIани арадал гъизвай ин­санриз куьмекда. Абурук къастуналди, ма­садбуруз манийвал тийиз, вичин мурадрихъ физвай, обществода лайихлу чка кьаз ва гьакI девлетлу жез кIанза­вай инсанарни акатзава. Амалдарвилелди, масадбур алдатмишуналди, намуссуз­вилелди чпин крар туь­кIуьрзавайбурун кIва­лахар кьилиз акъатдач, абур кIевера гьатда.

Россиядин Федерация патал 2020-йис гьихьтинди жеда? И суалдиз астрологри жуьреба-жуьре жавабар гузва. Гьа са вахтунда саки вирида гьисабзавайвал, сиясатдин, экономикадин жигьетдай 2020-йис Россия патал кьетIенди, важиблуди жеда. Дуьньядин майданда Россиядин дережа авай гьалдикни дегишвилер акатдалда.

Лугьузвайвал, вахтунин истемишунриз, эвер гунриз килигна, Конституциядин асул къайдайрани цIийивилер гьатун мумкин я. Гьукумдин къурулушдани реформайриз рехъ ачухда. Идахъ галаз ала­къалу яз, вини кьилин гьукум идара ийидай коллективный къурулушни арадал атун мумкин я. Ида жергедин агьалий­ризни, сиясатдин къарарар кьабулдайла, чпин активвал къалурдай майданар ачухда.­

Гороскопди къалурзавайвал, 2020-йисуз урус алимри илимда чIехи ва цIийи крар ачухда. Акьуллу, зигьинлу жегьилриз цIийи крар ахтармишунриз ахъайзавай инвестицийри тарифлу нетижаярни арадал гъида. Алай аямдин тIебиисуз интеллектар, гьахъ-гьисабар ийидай квантрин къурулушар, технологияр вилик тухудай цIийи ачухунар кардик акатда.

Кьилди экономикадикай рахайтIа, Гьамбардин кьифрен йисуз рикI къарсатмишдай аламатар тахьайтIани, финансрин рекьяй Россия са тIимил кIевера гьатда. Дуьньядин экономикада авай кризисдин гьаларизни, США-ди тухузвай акси политикадизни килиг тавуна, Россиядин Федерацияда финансринни экономикадин гьалар пайгардик кумукьда, са бязи хилерай виликдини фида. Россиядиз мад сеферда малумарнавай санкцийри уьлкведин экономикадин производстводин кар алай хилер вилик финиз куьмекда. Экспортдиз ракъурзавай шейэрин, метягьрин кьадарни хейлин виниз акъатда.

ТIвар-ван авай астрологри, аяндарри малумарзавайвал, 2020-йисалай арадал къвез башламишдай дегишвилер неинки са Россиядихъ, гьакI вири дуьньядихъ  галазни алакъалу жеда. И йисуз гьукумдин куьгьне, метлебсуз, виже яз амачир модель герек амукьдач. Дуьньядин сиясатдин майдандал цIийи девирдин принципар вине кьазвай къуватар акъатда. Чаз амукьдайди гуьзетун ва ахпа вуч жедатIа килигун я. Астролог Эдгар Кейсиди тестикьарзавайвал, дуьньяда лап зурба дегишвилер кьиле фида. Абуру дуьнья са чкадал акъваз тавунвайди, датIана гьерекатда авайди субутар хъийизва. Гьелбетда, аяндарри лугьузвай вири крар хъсанбур, къенибур туштIани, абуру геле­жегдик умуд кутадай мумкинвилер гузва­.

Россиядиз акси яз мадни санкцияр малумардайдакай лугьузва. Са рахунни алач, абуру уьлкведин экономикадиз виликди финиз кьецI гуда. Гьа са вахтунда, гьа санкцияр себеб яз, 2020-йисузни уьлкведин халкьдин майишатдин хейлин хилери экономика пайгардик к­ухтуниз куьмекда. Импортдин гзаф ме­тягьар чкадинбуралди эвезда. Абур, еридал гьал­­тайлани, къецепатанбурулай виняй жеда.  Россиядин манатдин мягькемвал, дурумлувал агъуз аватдачтIани, уьлкведихъ анжах къад йисалай экономи­кадин кризисдин гьаларай тамамвилелди экъечI­­­­­­­дай мумкинвал жеда. Куьрелди, Рос­сияди вичи кьунвай рекьяй виликди еримишда, ам садалайни вичин рекьелай алудиз алакьдач.

Тек-бир гъалатI жезвай аяндаррикай сад тир Павел Глобади гьисабзавайвал, 2020-йисан гатун варцара уьлкведа тамари цIаяр кьунихъ, тIебиатдин ресурсар хкудунихъ галаз алакъалу яз экологиядин муракаб гьалар арадал къведа. Зулуз меж­дународный майданда кьиле тухудай крарик гьерекат акатда. Алукьнавай йис политикадин, экономикадин жигьетдай Россия патал са акьван кутугайди жедач. Уьлкведа коммунальный къуллугърай къиметар хкажунихъ галаз халкьдин патай наразивилер, къенепата ажугъламиш къатарин кьадар артух жеда. Идаз килигна гьукуматди кIеви серенжемар кьабулун мумкин я. Ихьтин гьаларин вилик пад кьун патал коммунальный хиле тухузвай реформайриз цIийи кьилелай килиг хъувун лазим я.

Мадни къейдзавайвал, Сибирь Россиядин промышленностдин кар алай ва кьилин макандиз элкъведа. 2020-йисуз аниз гьукуматди артух фикир гуда ва экономикадин метлебар патал региондин мумкинвилерикай менфят къачуда.

Россиядинни США-дин арада акси акъвазарунар давам жедатIани, арабир абуру меслятвилин, санал кIвалаху­нин алакъаярни тайинарда. Астрологдиз аквазвайвал, Гьамбардин кьифрен йиса гележегда арадал къведай зурба дегишвилерин бинеяр кутада.

Украинадиз талукь яз Глобади икI лугьузва. Пайгарсуз гьалари халкь ажугъламишда ва ада уьлкведин президент хкядай цIийи сечкияр кьиле тухун, жуьрэтлу, кар алакьдай президент хкягъун истемишда ва йисан эхирдай гьахьтин сечкиярни тешкилда. Украина США-дин къаюмвиликай хкечIун мумкин я.

Астролог Светлана Драганан фикирдалди, Россия дуьньядин вини дережадин уьлкведиз элкъведа. Санкцийрик кутунватIани, уьлкведин экономикади дурумлудаказ виликди еримишда. Государстводин бюджет — артух, агьалийрин яшайиш хъсан же­да. Манатдин дережади мягькемви­лихъ­ ялда. Майдандиз политикадин цIийи башчияр экъечIда, абуру уьлкве къудратлу хьуник чпин пай кутада.

Аяндарри са кардикай мад лугьузва: Сирия международный террористрин кIапIалрикай саки азаднаватIани, террористрин, экстремистрин дестейрин зулуматдин гьерекатар акьалтIдач. Абур чпин къурулушар артухариз, жезмай кьван чпин идеология гзаф уьлквейра чукIуриз, са нин ятIани алчах, хаинвилин тапшуругъар кьи­лиз акъудиз алахъда. Чка-чкада тер­актар авуникайни абуру кьил къакъуддач.

Абуру хабар гузвайвал, “информациядин дяве” мадни къуватда гьатда ва адан майданар гегьенш жеда. Гаф гапурдилайни хци жедалда. Дуьньяда ва иллаки Европада кьиле фидай дегишвилер себеб яз, хашпара дин усал хьунин ва исламди вичин сергьятар мадни гегьеншарунин гьалар арадал къведа.

Вангадин гафаралди, дуьньядин майданда куьгьне къайдаяр квахь­да ва цIийи­бур арадал къведа. Иллаки Рагъ­акIи­дай патан уьлквейра ва США-да. США-ди Россиядихъ галаз бягьс чIугун да­вамар­да, ам Россиядин къенепатан кра­рик къаришмиш жез алахъда. Россия­ни кисна акъваздач, ада вичиз аксивалзавай государствойрив кутугай жаваб ахгакьарда.

Ада гьакI Чилин мумкинвилер тIимил жезвайдакайни, ам гьалдай физвайдакайни ихтилат тунва.

Аяндарри ва политикри гьисабзавайвал, санлай къачурла, Гьамбардин кьифрен йис гзаф терефрихъай кутугайди, хъсанди, бегьерлуди жеда. Къуй дуьнья  ислягь, хъсан крар, вакъиаяр гзаф, инсанрин дуланажагъ агьваллу хьурай!

Нариман Ибрагьимов