Коронавирусдин нубатдин лепе къарагънавайди садазни сир туш. ТIегъуьн акатзавайбурун, рекьизвайбурун кьадар йи­къа­лай-къуз гзаф жезва. 14-июлдин делилралди, Урусатда коронавирус акатнавайбурун кьадар 6 миллиондив агакьзава. Са йикъан къене тIегъуьндин есирда гьатзавайбурун кьадар лагьайтIа, 24 агъзурдалай алатзава. Виридалайни гзаф начагъбур Москвада (212978), Москвадин областда (53320), Санкт-Петербургда (21966), Нижегородской областда (15328), Свердловский областда (10725), Ростовский областда (8381), Красноярский крайда (7432) ва Дагъустанда (7103) ава. Са вацран вилик авай рекъемрив гекъигайла, якъин жезвайвал, алай вахтунда гьалар къвердавай пис жезва.

Дагъустанда коронавирус акатнавайбур виридалайни гзаф Махачкъалада, Каспийскда, Къизлярда, Буйнакскда, Буйнакский районда, Къизилюртда ава. Республикадин кьиблепатан районрикай рахайтIа, ина тIегъуьндик начагъ жезвайбурун кьадар тIимил я.

12-июлдиз Сулейман-Стальский, Кьурагь ва Докъузпара районра коронавирусдин вилик пад кьун патал кардик ку­тунвай штабрин заседанияр, совещанияр кьиле фена. Анрал тIвар кьунвай районрин больницайрин кьилин духтурри муни­ципали­тетра авай гьаларикай хабар гана. Сулейман-Стальский райондин больницадин кьилин духтур Жафер Къурбанисмаилован гафаралди, алай вахтунда инфекцийрин отделенида стIалжем акатнавай 18 кас ава, абурукай пудак коронавирус квайди тестикь хьанва. Кьве кас тIе­гъуьн­дик телеф­ хьана. Идалай гъейри, районда духтуррин гуьзчивилик кваз кIва­лин шартIара 45 кас сагъар хъийизва. Ж.Къурбанисмаилова къейд авурвал, абу­рукай садани коронавирусдиз акси раб янавач.

Сулейман-Стальский райондив гекъи­гайла, Кьурагь районда начагъбурун кьадар тIимил я. Муниципалитетдин сайтда чапнавай малуматдай хабар жезвайвал, районда алай вахтунда стIалжемдик начагъ 9 кас ава.

Докъузпара райондин больницадин кьилин духтур Шагьлар Бухсаева корона­вирусдин вилик пад кьунин штабдин районда кьиле фейи нубатдин заседанидал къейд авурвал, муниципалитетда алай вахтунда коронавирус акатнавай са агьалини авач. Амма стIалжем акатнавай 4 кас, духтуррин гуьзчивилик кваз, кIвалин шартIара сагъар хъийизва.

Коронавирусдин жигьетдай виридалайни къизгъин гьалар республикадин меркезда арадал атанва. Дагъустандин здравоохраненидин министерстводин делилралди, тек са йикъан къене (13-июлдиз) тIегъуьнди чи арадай 7 кас акъудна. Шегьердин 1-нумрадин клиникадин больницадин кьилин духтурдин куьмекчи Исрафил Исрафилова хабар гузвайвал, 12-июлдиз и больницадиз коронавирус акатнавай 90 кас агакьарна. Абурун арада са жегьил гадани авай. Адан диде-бубани алай вахтунда и больницада къатканва. Гададин вах са шумуд йикъан вилик меркездин маса клиникада коронавирусдик телеф хьана. Са гафуналди, вири хизан тIегъуьндин чилина гьатнава. И мисалдай аквазвайвал, эгер хизандай са кас начагъ хьайитIа, амайбурукни тIегъуьн акатзава. Гьавиляй чакай гьар сад жуван сагъламвилел мукъаят хьана кIанда.

Республикадин здравоохраненидин министерстводин пресс-къуллугъди хабар гузвайвал, шегьердин больницаяр начагъбурай ацIанва. Меркездин куьчейрай тади куьмекдин улакьрин сигналдин ван кими жезвач. Йикъа-йикъа жуьреба-жуьре клиникайрив цIудралди начагъбур агакьарзава. И йикъара Исмаилован тIварунихъ галай медицинадин центрадани коронавирус акатнавайбур кьабулдай кьилдин стационар кардик кутунва. Ана лазим тир вири шейэралди таъминарнавай 50 чарпай ава.

Духтурри, пешекарри къейдзавайвал, коронавирусдин вилик пад кьунин рекье виридалайни менфятлу яракь раб ягъун я. РФ-дин здравоохраненидин министерводин пресс-къуллугъдин делилралди, тIимил рапар язавай регионрик Дагъустанни акатнава. 12-июлдин рекъемралди, республикада коронавирусдиз акси рапар 187 агъзурни 146 касди янава.

Алай вахтунда Дагъустандин жуьреба-жуьре шегьерра, районра рапар ядай стационарный 87 ва мобильный 47 пункт кардик ква.

И йикъара РД-дин Гьукуматдин Председателдин заместитель Мурад Къазиевни здравоохраненидин министр Татьяна Беляева Махачкъалада кардик квай коронавирусдиз акси рапар язавай пунктарин кIвалахдихъ галаз таниш хьана. Рапарин кьитвал авач. Татьяна Беляевади хабар гайивал, мукьвара Дагъустандив “КовиВак” тIвар алай алава дарман агакьда. Са шумуд вацран вилик авай гьаларив гекъигайла, исятда рапар язавайбурун кьадар гзаф жезва. Амма, санлай къачурла, республикада и кIвалах лап зайиф камаралди вилик физва.

Урусатдин Гьукуматди коронавирус акатнавайбур сагъар хъувунин карда герек жезвай дарманар маса къачун патал регионриз пулдин такьатар ахъайнава. Дагъустандиз 29 миллионни 113 агъзур манат чара авунва.

Играми ватанэгьлияр!  Духтурри, пешекарри гузвай меслятрал амал ая. Гзаф кьадар инсанар кIватI жезвай мярекатриз фимир, туьквенриз, аптекайриз, маса идарайриз фидайла, маска алукI, мукьвал-мукьвал гъилер чуьхуьх. Коронавирусдиз акси раб ягъуникай къерех жемир. РикIел хуьх: куь сагъламвилелай куь хизанрин сагъламвални аслу я!

Агьмед  Магьмудов