Алай йисан 15-февралдиз РД-дин Кьилин везифаяр вахтуналди тамамарзавай Сергей Меликов республикадин мергьяматлувилин фондарин регьберрихъ галаз гуьруьшмиш хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Гуьруьшмиш хьайи вахтунда уьмуьрдин четин шартIара гьатнавай инсанриз ва гьакI тIугъвалдин инфекция гегьенш хьанвай вахтунда, яшлу инсанриз ва набутриз яшайишдин жигьетдай куьмек гуниз талукь яз, гьукумдин государстводин органрини мергьяматлувилин фондари санал кIвалахуникай ихтилат фена.
Кьиле физвай рахунрин важиблувал къейд авуналди, Сергей Меликова лагьана хьи, республика вилик физвай гьалара адал еке четинвилер акьалтзава. Ихьтин гьалара кьуру рахунар ийидалди, итIи-битIийра экъвез, масадбурук тахсирар кутадалди, вири къуватар къени крарал желб ийидайла, обществодин гражданвилин институтрин роль кьетIенди я.
Сергей Меликова тIугъвалдихъ галаз женг чIугвазвай вахтунда тешкилнавай кIвалахдиз кьилди къимет гана. “Гьар ихьтин муракаб ва четин вахтара жезвайвал, тIугъвалдихъ галаз женг чIугвадайлани, чи ватандашрин лап хъсан къилихар, ерияр винел акъатна. Экономикадин четин гьаларизни килиг тавуна, и гуьруьшда ацукьнавай хейлинбуру чи инсанар къутармишунин ва сагъламвилихъ галаз алакъалу идарайриз куьмек гунин карда жумартвал къалурна. Мергьяматлувилин организациярни къерехда акъвазнач”.
Сергей Меликова гьакI тIугъвалдихъ галаз женг чIугвазвай варцара гьукумдин жуьреба-жуьре органрин векилри ва депутатри гайи куьмекдикайни рикIел хкана. Кьилди-кьилихъди ада Россиядин Федерациядин Советда Дагъустандин патай авай векил Сулейман Керимова Дагъустандиз гузвай куьмек къейдна.
Гьа са вахтунда С.Меликова республикада и жигьетдай тамамарзавай кIвалах са къайдадиз гъунин игьтияж авайдакайни лагьана. “Россиядин Общественный палатади 2020-йисан нетижайриз талукь яз туькIуьрнавай делилралди, “Поддержка НКО регионов”, “Экономическая значимость”, “Социальная значимость” программайрай Дагъустан сиягьдин эхирдай вад лагьай чкадал акъатна. Аквар гьаларай, им михьи рикIелди, руьгьдин эмир яз ийизвай темягьсуз крар инсанри вини кукIуш (индикатордин лишан) хьиз къалур тавунихъ галаз алакъалу я. Гьелбетда, чун патал важиблуди инсанри четин месэлаяр гьялун я. Чаз мергьяматлувилин организацийри, кьилдин ксариз куьмек гунихъ галаз сад хьиз, и важиблу кIвалах хъсандиз тешкилунни важиблу я. Ахпа адан нетижайрални чна дамахда”, — малумарна С.Меликова.
КIеве авай, игьтияжлу инсанар яшайишдин кIвалералди таъминарун лап важиблу везифа тирдакай лагьана региондин Кьили. Ада республикада инсанар яшайишдин кIвалералди таъминаруниз куьмек гудай резервдин фонд тешкилнавайди рикIел хкана. ГьикI лагьайтIа, республикада агьалийри, йисаралди нубатда акъвазна, кIвалер гун гуьзетзава.
“Къведай йисуз чна, гьикI авуртIани, и фонд патал пулдин такьатар чара ийида. Вучиз лагьайтIа, бязи вахтара инсанар рикIелни алачиз четинвилера гьатзава. Исятда чун, вичин чанни къурбанд авуна, боевикрикай са хизан къутармишай мешебеги Зейнудин Батманован хизан кIвалералди таъминарунин месэладин гуьгъуьна ава. Адетдин мешебегиди игитвал къалурна, бандитар хуьруьз ахъайнач. Эгер ам военный къуллугъчи ва государстводин къуллугъдал алай кас тиртIа, уьлкведи адаз яшайишдин вири жуьредин куьмекар гудай. Гьавиляй ихьтин дуьшуьшра гьатзавай инсанар кIевяй акъудун патал чаз резервдин фонд герек я. Ам чна арадални гъида”, — лагьана С.Меликова ва ада мергьяматлувилин организацийриз, меценатриз и фондунин иштиракчияр хьуниз эверна. Гьа са вахтунда РД-дин Гьукуматдизни, герек чарар-цIарар туькIуьрна, и месэладив рикIивай эгечIунин тапшуругъ гана.
Идалайни гъейри, С.Меликова РД-дин зегьметдин ва яшайишдин рекьяй вилик финин, эцигунринни ЖКХ-дин министерствояр, мергьяматлувилин организациярни кваз, рабочий десте тешкилун тапшурмишна.
Игьтияжлу агьалийриз куьмек гунин мураддалди РД-дин зегьметдин министерствода гзаф каналрин сад тир колл-центр кардик кутунва ва аниз 800 касди арзаяр гана. Министерстводи мергьяматлувилин фондарихъ галаз санал Дагъустандин мулкунал яшамиш жезвай жуьреба-жуьре рекьерай куьмек герекзавай инсанрин сиягь туькIуьрнава. ТIугъвалдин варцара ахьтин хизанриз, агьалийриз куьмек гун патал социальный 4,3 агъзур кас машгъул хьана. Абуруз гьакI республикадин волонтеррини ва мергьяматлувилин фондарин, общественный организацийрин векилрини куьмекна.
«Лезги газет»
