Фейзудин Нагъиеван – 75 йис
15-апрелдиз Махачкъалада, Р.Гьамзатован тIварцIихъ галай милли ктабханада, Дагъустандин халкьдин шаир Фейзудин Нагъиеван яратмишунрин межлис кьиле фена. ЧIалан устаддин 75 йисан юбилейдиз талукьарнавай и мярекат «Лезги газетдин» кьилин редактор Мегьамед Ибрагьимова кьиле тухвана.
Атанвай мугьманрин арада РД-дин Гьукуматдин Председателдин заместитель Нариман Абдулмуталибов, писателрин союздин председатель Марина Агьмедова, Дагъустандин гуманитарный колледждин директор Мурад Шафиев, ДГПУ-дин филологиядин факультетдин декан Руслан Къадимов, алимар тир Саимат Юзбегова, Халидин Эльдаров, Букар Гьамидуллаев, Владимир Абдурагьманов, машгьур композитор Къагьриман Ибрагьимов, шаирар, гьикаятчияр, жемиятдин, СМИ-рин векилар ва масабур авай.
Шаирдин яратмишунрин межлис ктабханадин къуллугъчи Секинат Мусаевади ачухна. Мярекат кьиле тухун ада Мегьамед Ибрагьимоваз теклифна. «Лезги газетдин» кьилин редакторди Фейзудин Нагъиеван уьмуьрдикай, яратмишунрикай куьрелди малуматар гана. Ада къейд авурвал, чпиз «халкьдин» тIвар ганвай бязи чи векилар милли мярекатра кьериз-цIаруз аквазватIани, Фейзудин Нагъиев гьамиша хайи жемятдин юкьва ава, адан хийир-шийирдик, мярекатрик ква. Гьавиляй адаз халкьдин патайни еке гьуьрмет ава.
Гуьгъуьнлай межлисдал рахай Нариман Абдулмуталибова, Марина Агьмедовади, Саимат Юзбеговади, Руслан Къадимова, Максим Алимова, Къагьриман Ибрагьимова, Тамила Хуршидовади, Мариян Бугаевади, Репия Къарибовади, Гъулангерек Ибрагьимовади ва хейлин масабуру шаирдин эсеррикай, адаз хас ерийрикай, ктабрикай чпин фикирар лагьана, 75 йисан юбилей мубаракна.
Махачкъаладин 38-нумрадин гимназиядай атанвай аялри (муаллим – Алимат Баламирзоева) кIелай шиирри, ашукь Айдуна, Фазил Асланова, Гуьлназ Алибеговади тамамарай манийри мярекат мадни гурлу авуна.
Фейзудин Нагъиева мярекатдиз атайбуруз сагърай лагьана ва вичин ктабрикай куьрелди ихтилатар авуна.
Агьмед Магьмудов
