Алатай гьафтедин эхирра Махачкъалада са мертебадин кIвали цIай кьунин нетижада кьуд кас телеф хьана. ТАСС-ди хабар гузвайвал, абурукай сад — жегьил дишегьли, пуд аялар тир.
Мусибатдин вакъиа меркездин Нурудилован тIварунихъ галай куьчеда арадал атана. РД-дин МЧС-дин делилралди, цIун есирда 20 квадратдин метр майдан авай. ЦIаяр хкадардай къуллугъчияр гьикьван чалишмиш хьанатIани, нетижа писди хьана. Пуд кас чкадал телеф хьана. Са аялди республикадин клиникадин азарханада чан гана, духтурривай адаз куьмекиз хьанач.
Дагъустандин Кьилин везифаяр вахтуналди тамамарзавай Сергей Меликован тапшуругъдалди, телеф хьайибурун мукьвабуруз вири жуьредин куьмекар гуда.
ЦIай квелай кьунатIа тамамдиз тайин хьанвач. Арадал атай вакъиадин гьакъиндай силисдин органри уголовный дело къарагъарнава. Силисчийрин фикирдалди, цIай кьунин себебрикай сад кIвализ экв гъанвай шнурар къайдадик тахьун я.
Играми газет кIелзавайбур! Республикада жуьреба-жуьре себебралди цIаяр кьазвай дуьшуьшар тIимил туш. Гьавиляй мукъаятвал хвена кIанда. Куь кIвалера газдихъ, экверихъ галаз алакъалу кIвалахар кьиле тухудайла пешекарар желб ая.
«Лезги газет»
