Азербайжандиз Дагъустанда виниз тир технологийрин къелемлух арадал гъуниз такьатар серфдай ният ава. ГьакIни къунши уьлкведи республикада зейтундин багъ кутаз ва зейтундин емишар гьялдай кархана арадал гъиз кIанзава.
Идакай «S.R.Plast» компаниядин учредитель Рамин Сейфуллаева ПМЭФ-2024 форумдал хабар гана. Фикирзавайвал, къелемлух Агроцентрадин майдандал, виридалайни эхиримжи технологияр ишлемишна, арадал гъида. Сифтегьан паюна пландик кутунвай крариз, малум хьайивал, 2 миллион доллар серфдайвал я. Идалайни гъейри, Дагъустандин мулкунал зейтундин сад лагьай багъ пайда жеда.
«Дагъустанди къенин юкъуз вичихъ авай мумкинвилералди желбзава, гьаниз килигна, чна ам экономика патал важиблу амадаг яз гьисабзава», — къейдна Рамин Сейфуллаева, проектдиз талукь яз баянар гудайла.
ПМЭФ-дин сергьятра аваз, гьакIни Крым Республикада 60 гектардин мулкунал теплицайрин комплекс эцигуниз талукь икьрардални къулар чIугуна. И проект уьмуьрдиз кечирмишун патал Азербайжандин «Isfa» ва «Green Plast», гьакIни Дагъустандин «S.R.Plast» компаниядин мумкинвилер ишлемишда. Инвестицийрин умуми кьадар 750 миллион манатдиз барабар жеда.
Амина Муслимова
