.  Мьянма Кьиблединни РагъэкъечI­дай патан Азиядин, Индокитай полуост­ровдин рагъакIидай пата авай гъвечIи ­уьлкве я.

.  И уьлкведин умуми майдан 678 агъзур квадратный километрдикай ибарат я. Ана 53 миллионни 600 агъзур кьван агьалияр яшамиш жезва.

.  1989-йисалди Мьянмадиз Бирма лугьузвай.

.  Мьянмадиз Индиядихъ, Бангладешдихъ, Китайдихъ, Лаосдихъ, Таиланддихъ галаз сергьятар ава.

.  2010-йисуз и уьлкведин тIвар «Рес­публика Союз Мьянма» хьана, акьван чIавалди «Союз Мьянма» тир. ГьакIни и йисуз государстводин герб ва пайдах дегишарна.

.  Мьянма Азиядин экзотикадин уьл­квейрикай сад яз гьисабзава. Иниз турис­тар гзафни-гзаф къадимвилиз, куьгьне чкайриз, затIариз килигун патал физва.

.  Мьянмадин кьилин шегьер 2005-йисалай Нейпьидо я. Виликдай меркез Янгон тир.

.  Мьянмада гзафни-гзаф буддизмдиз ибадатзавай агьалияр ава. ГьакIни ана мусурманар ва хашпересар, 100-далай гзаф халкьар яшамиш жезва. Абур чпин акунралдини, нугъатралдини тафаватлу я. Ина бирма чIал кьилинди я.

.  «Мьянма» гафунин мана «йигинди», «къуватлуди» лагьай чIал жезва.

.  Ина гьафте 8 йикъакай ибарат я. Кьилди къачуртIа, арбе югъ ина кьве йикъаз пай жезва: арбе-югъ ва арбе-няни.

.  Мьянмадин меркезда такси жагъуриз жеда, амма муькуь шегьерра таксияр саки гьалтзавач. Себеб ам я хьи, агьалийриз таксидиз гудай пул авач.

.  Мьянмадин агьалийриз фамилияр авач. Амма тIварарин вилик абуру диши-эркеквал, яш ва общественный дережа къалурзавай гафар ишлемишзава.

.  Британияда хьиз, Мьянмадани аялар мектебдиз 5 йис тамам хьайила физва.

.  Чкадин гзаф агьалийри шей-затI кьилел эцигна тухуда. И жуьреда абуру къулай яз гьисабзава.

.  Мьянма гьайванрин, набататрин алемралди девлетлу я. Чи планетадин маса чкайра экъечI тийизвай 1 агъзур кьван набататар ина гьалтзава.

Гьазурайди — К.Ферзалиев