Уьлкведин гьукумдаррин, Яракьлу Къуватрин вилик важиблу месэла акъвазнавай къенин девирда гьар са агьалиди вичин ватанпересвилин, инсанпересвилин ва жуьрэтлувилин руьгьдалди умуми макьсаддив агакьун патал зегьмет чIугвазва, алакьдай куьмекар гузва. Важиблу месэла лагьайла, ихтилат, гьелбетда, СВО-дикай физва. Уьлкведин Президент Владимир Путина къейд авурвал, Россиядин гьукумдарри, СВО-дин зонада авай аскерри хьиз, вири къуватар эцигна, кIвалахун лазим я.
Лугьун герек я хьи, женгера чпин буржи баркаллувилелди кьилиз акъудунин жигьетдай дагъустанвияр тафаватлу жезва. Идан гьакъиндай дяведин махсус серенжем башламишайдалай кьулухъ чи региондай Россиядин Игит лагьай тIварцIиз лайихлу хьанвайбурун кьадарди шагьидвалзава.
Украинадин миллетбазрихъ галаз кьиле физвай женгера кьегьалвилер къалурунилай гъейри, чи ватанэгьлийри аскерриз чпелай алакьдай куьмекарни гузва. Ихьтин чешнеяр чавай цIудралди, вишералди гъиз жеда.
Мисал яз, Докъузпара райондин Къурушдилай тир Алимегьамед Рустамова алай йисан мартдиз СВО-да иштиракзавай чи аскерриз вичин патай «Нива» машин ракъурна. И мукьвара ада мад са мергьяматлувал кьилиз акъудна: «Камаз» машинда аваз 14,5 тонн хъвадай «Мевер» яд агакьарна.
Ватандин итижар хуьзвай аскеррин руьгь хкажзавай, абуруз вичелай алакьзавай куьмекар гузвай Алимегьамедан мергьяматлувилин серенжемрикай хабар хьайила, за адахъ галаз таниш хьун кьетIна.
Алимегьамеда ихтилат авурвал, ам гагь Къурушдал, гагь Дербент шегьерда яшамиш жезва. 2023-йисан 2-февралдиз адан гъвечIи стха Рустам Рустамов СВО-да игитвилелди телеф хьана. Дербент шегьерда медицинадин училищедин 1-курсуна кIелзавай Рустам дяведин махсус серенжем кьиле физвай мулкариз тамам тушир мобилизациядин сергьятра аваз фенай. Р.Рустамов 1999-йисан 22-январдиз Докъузпара райондин Къурушрин хуьре дидедиз хьана.
Къейд ийин, РФ-дин Президент В.Путинан къарардалди Рустам Теймурович Рустамован игитвал Жуьрэтлувилин ордендалди (кьейидалай кьулухъ) къейдна.
«Сифтедай за «Нива» машиндин куьлегар миллетбазрихъ галаз женг чIугвазвай чи аскеррив вахкана. Гила, и мукьвара, зи стхадихъ галаз санал къуллугъай аскерар авай мулкуниз хъвадай яд ракъурна. Улакьдин месэла, рекьин харжияр «Камаз» гвай кIелетви Султанмурад Умарова вичин хивез къачуна», — лугьузва Алимегьамеда.
Гъалибвал мукьвал авуник пай кутазвай вирибуруз баркалла!
К. Ферзалиев
