Жегьилрин агалкьунар

Бажарагълу аялар патал республикада гьар жуьре конкурсар, мярекатар кьиле тухузва. Ахтармишунрал машгъул жегьилар патал тешкилзавай республикадин «Гележегдиз кам» конференцияни алакьунар авай аялар патал хъсан серенжемдиз элкъвенва.

ЦIи и мярекатда Докъузпара райондин Мискискарин хуьруьн М. Ахундован тIварцIихъ галай юкьван мектебда 9-классда кIелзавай Хизбуллагь Гьафизовакай «Зоология ва экология» секцияда гъалибчи хьана.

ТIвар кьунвай конференция цIи ХХХ сеферда кьиле тухвана. Бажарагъар­ вилик тухудай «Альтаир» центради­ РД-дин образованидинни илимдин минис­те­р­ст­во­дин куьмекдалди тешкилзавай мярекатди чпихъ гележег ва илимдин рекьяй вилик фидай мумкинвилер авай несилар чIехи жезвайдан гьакъиндай шагьидвалзава.

Мярекатдиз Дагъустандин мектебра кIелзавай 200-далай гзаф аялри кьуд хиляй чпин илимдин кIвалахар теклифнавай: инженервилин илимар, тIебии илимар, математика ва информациядин технологияр, социально-гуманитарный илимар.

Докъузпара райондин патай мярекатда «Химия ва химиядин технологи­яр» секциядин жюридик кваз Мискискарин мектебдин химиядин муаллим Эльмурад Арасханова, Хизбуллагь Гьафизо­ваз илимдин  рекьяй  регьбервал  авур  Разия Саркаровади агалкьунралди иштиракна.

Къейд ийин хьи, Хизбуллагь маса­ предметрайни хъсандиз кIелзавай, датIа­на олимпиадайрани конкурсра иштиракзавай ученик я. Мисал яз, мукьвара физикадай Кьиблепатан Дагъустанда кьиле фейи олимпиадада адакай гъалибчи хьана. Хизбуллагьан буба Ариф Гьафизов муаллим, тренер, спортдин рекьяй гзаф жегьилар патал насигьатчи хьанвай Лезгистандин пагьливан я.

Чаз илимдиз итиж ийизвай жегьилдихъ ва адан муаллимрихъ мадни еке агалкьунар хьана кIанзава.

С. Салимов