КIвалах тийиз — мажиб къачуз
РФ-дин РД-да авай УФСБ-дин материалрал асаслу яз, Гергебиль райондин ОМВД-ди РФ-дин УК-дин 159-статьядин 4-паюнай (лутувал) и райондин администрациядин кьилин пешекардиз талукь яз уголовный дело къарагъарнава. Идакай РД-дин МВД-дин пресс-къуллугъди хабар гана.
Силисчидин ахтармишунрин делилралди, винидихъ къейднавай администрацияда, къуллугъдал алай ксар алцураруналди, абурун ихтибардикай менфят къачуналди, шак фенвай дишегьлиди къалп жуьреда чкадин мектебда вич, вичин юлдаш, хва ва руш кIвалахал тайинарна.
ИкI, 2017-йисалай 2020-йисалди къанунсуз кардиз рехъ гайидаз ва адан багърийриз, мажиб яз (гьакъикъатда абуру кIвалах авунач), санлай 1 миллионни 900 агъзур манат пул гана. И такьатар шак фенвайда вичиз кIандайвал ишлемишна.
Тахсиркарвилиз рехъ гуналди, дишегьлиди гьукуматдиз чIехи кьадар пулунин зиян гана. И делилдай ахтармишунин кIвалах давам жезва.
Наркотикар ишлемишунай
Дагъустандин МВД-дин ГКОН-дин къуллугъчийри Къизляр райондин Сангиши хуьруьн 22 йисан яшда авай агьали кьуна. Кьилди вич ахтармишайла, адав гъуьр хьтин затI квай полимердин багъламаяр гваз хьана.
Экспертизади тайинарайвал, адавай вахчурди 4,77 граммдин мефедрон ва 0,83 граммдин гашиш тир. Жегьилди наркотикар интернетдин куьмекдалди жагъурна ва, гъвечIи пакетра туна, вич абур маса хгунал машгъул хьана. Полициядин къуллугъчийри чIуру кардал машгъул касди наркотикар хуьзвай чинебан чка чирна. Анай мад 11 граммдилай гзаф мефедрон жагъана.
Тахсиркарвилин лишанриз килигна, РФ-дин УК-дин 228-статьядай уголовный дело къарагъарнава.
«Лезги газет»
