Къайдаяр чIурмир!
Дагъустандин рекьера 4-декабрдилай 10-декабрдалди 28 авария хьана. Идакай РД-дин МВД-дин пресс-къуллугъди хабар гузва.
Къейдзавайвал, 28 ДТП-дин нетижада 6 кас кьена (абурукай сад аял я), 42-дал хирер хьана (абурукай пуд аялар я).
Рекьерин гьерекатдал гуьзчивал тухузвай органрин къуллугъчийри улакьар гьалзавайбуруз рекьера мукъаятвал квадар тавуниз эвер гузва. Жув ва жуван багърияр хуьх!
Залан тахсиркарвал
Махачкъаладин полициядин къуллугъчийри залан тахсиркарвал авунай шак физвай кас тайинарна ва отделдиз хкана.
13-декабрдиз, нянин сятдин тахминан кIуьдан зураз, Архитектурный куьчеда авай кIвале 55 йисан яшда авай чкадин агьалиди арада къалмакъал хьуникди 51 йисан яшда авай, ЦIийи Хушетдай тир агьалидин хуруз чукIул сухна. Нетижада хер хьайи агьалиди чкадал чан гана.
Полициядин отделдиз хкайла, шак фенвайда ихтилат авурвал, къейднавай нянин вахтунда ада танишдахъ галаз ички квай затIар хъвана. Гуьгъуьнлай абурун арада къал акъатна. И чIавуз махачкъалавиди чукIул къачуна ва вичихъ галайди адалди яна.
Полициядин къуллугъчийри а чукIул вахчуна. КIватIнавай материал Россиядин СК-дин РД-да авай СУ-диз ракъурнава.
«Лезги газет»
