Лутувал авунай
3-октябрдиз Каспийскдин полициядин дежурный частуниз арза гваз чкадин кьве агьали атана. Абурун гафаралди, 17 йисан яшда авай шегьерэгьлиди, алцурар авуналди, 700 агъзур манат къакъудна. Идакай РД-дин МВД-дин пресс-къуллугъди хабар гузва.
Полициядин къуллугъчийри тади гьалда кьабулай серенжемрин нетижада шак фенвайди кьуна ва отделдиз хкана. Жегьилди вичи авур кар хиве кьуна. ЧIуру ният авайда ихтилат авурвал, ада вичин танишриз гъил агакьдай къиметдай автомобилдин хъсан нумраяр теклифна, амма а нумраяр гьакъикъатда адахъ авачир.
ШартIуналди маса гуда лагьай госнумраяр мукьвара муьштерийрин кIвачихъ хъияда лагьана, гьакъини къачуна. Амма пул гъиле гьатайдалай кьулухъ жегьил алакъадиз эхкъечIнач.
И делилдай суд-дуван авун патал материал кIватIнава.
Къугъунаг чуьнуьхунай
И йикъара Каспийскдин полициядин дежурный частуниз къугъунагрин (игрушкайрин) туьквендин директор арза гваз атана, хабар гузва МВД-дин пресс-къуллугъди.
Арзачидин гафаралди, малум тушир ксари 10 агъзур манатдин къимет авай аялрин конструктор чуьнуьхна. Полициядин къуллугъчийри шак физвайбур тайинарна ва отделдиз хкана. Абур 30 ва 40 йисан яшара авай, Къизляр райондин агьалияр (пабни итим) я. Абуру ихтилат авурвал, дезгедилай конструктор къачуна, чантадиз вегьена, туьквендай хутахна ва хциз пишкешна.
И делилдай РФ-дин УК-дин 158-статьядай (угъривал) уголовный дело къарагъарнава.
«Лезги газетдай»
