Пул чуьнуьхунай шак физва
Алай йисан 1-июндиз Дагъустандин Огни шегьердин полициядин отделдиз 45 йисан яшда авай чкадин агьали арза гваз атана. Ада ихтилат авурвал, малум тушир касди, вичин кIвализ гьахьна, анай 100 агъзур манат пул чуьнуьхна. Идакай РД-дин МВД-дин пресс-къуллугъди хабар гузва.
Тади гьалара кьабулай серенжемар себеб яз, полициядин къуллугъчийри мумкин тир угъри тайинарна. Шак фенвайди 44 йисан яшда авай арзачидин уьмуьрдин юлдаш я. Итимдин кайвани полициядин отделдиз хкана.
Дишегьлиди ихтилат авурвал, итимди чирхчирдивай пул буржуна кьунвайди чир хьайила, ада и пул чуьнуьхун ва катун кьетIна. Ихьтин къарар кьабулунин себеб дишегьлиди малумарнач.
Итим кIвалахал фидай вахт вилив хвена, шак фенвайда пул чуьнуьхна ва, шейэр кIватIна, автобусда ацукьна. Амма яргъаз фидай мумкинвал хьанач – полициядин къуллугъчийри ам Бабаюрт районда кьуна.
Тахсиркарвилин лишанриз килигна, РФ-дин УК-дин 158-статьядин 2-паюнай (угъривал) уголовный дело къарагъарнава.
«Лезги газет»
