Курхуьрелай тир хъсан музыкант, муаллим Саругъланов Гуьлмет гзафбуруз чида. Адаз вичин тарифарна кIандач. Амма герек чкадал, герек вахтунда вичин гафунал кIевиз акъвазда…
Музыкантвилин пеше ада, вичи вичиз веревирдер авуна,бубадални меслят гъана, хкяна. Мектеб куьтягьайдалай гуьгъуьниз 1976-йисуз ам Дербентдин музыкальный училищедик экечIна. Музалатар ягъиз Гуьлметаз гьеле гъвечIизмаз чизвай. Ада вичин дах Агьмедбеган “Казань” чIагъан, зуьрне, балабан, кфил, тафт устаддаказ язавай. Училищеда ада и рекьерай композитор Насир Бабаевичан, Ибрагьим Абдулаевичан гъилик чирвилер мадни деринарна, алава яз, кларнет ягъизни чирна. Ямахани устадвилелди язава.
1979-йисуз Гуьлмета музучилище хъсан чирвилерни алакьунар аваз акьалтIарна. Ада Курхуьруьн мектебда (1979-1985-йисара) музыкадин муаллим, гуьгъуьнлай райондин музшколада художественный руководитель яз кIвалахна. Вад-ругуд йисалай Г.Саругъланов хуьруьн 2-нумрадин мектебдиз кIвалахал хтана, къени ина гьакъисагъвилелди зегьмет чIугвазва.
Гуьлмет Саругъланова мектебда музыкадин кабинетни туькIуьрнава. Ана аквадай ва тарсара герек къвезвай такьатар, музыкадин алатар ава. Мектебда кьиле физвай шад гьар са мярекат Гуьлмета кларнетдалди лезги макьамар ягъуналди мадни гурлу ийизва. Ада тарсара, кружокда чирвилерни вердишвилер гузвай аялри, гьакI вичини райондин конкурсрани иштиракзава. ИкI, мукьвара районда халкьдин музыкадин алатралди милли макьамар тамамарунай кьиле фейи конкурсда Гуьлмета 1-чка кьуна. Ада балабан, кфил, зуьрне устаддиз яна.
Гуьлметан гада Багъир — пешекар музыкант, стхаяр тир Вилимет, Тарзан, Рауф — бажарагълу далдамчияр, стхадин гада Нарик тIвар-ван авай манидар я.
Алай вахтунда Сулейман-Стальский райондин — 90 ва камалэгьли СтIал Сулейманан 150 йисарин юбилеяр кьиле тухун патал Курхуьруьн мектебдани гьазурвилер аквазва.
Райсудин Набиев
