Чи аялри гьар юкъуз ДЮСШ-ра кьуршахар кьунай тренировкайра ашкъидалди иштиракзава. Тренерар тир СССР-дин спортдин мастер Фейруз Садыхова ва Давуд Алиханова абуруз азаддиз кьуршахар кьунай техникадин сирер чирзава. Гележег авай жегьил пагьливанрикай сад Гьамид Эминов я. Спортдин секциядиз къвез са акьван вахт туштIани, Гьамида гьа сифте йикъарилай вич уьтквем гада тирди къалурна. Гьавиляй агалкьунрини чеб гуьзетиз тунач. ИкI, Ватан хуьзвайбурун йикъаз талукь яз Ахцегьа, Гъаниеван тIварунихъ галай ДЮСШ-да, 2005-2007-йисара дидедиз хьанвай жаванрин арада кIвенкIвечивал къазанмишун патал тухвай турнирда ам вичин заланвиляй (48 кг) 1-чкадиз (шикилда) лайихлу хьана. Умудзава хьи, гележегда ада вичикай республикадин майданрани малумарда.
Кьуршахар кьунилай гъейри, Гьамида районда мини-футболдай, шахматрай турниррани активвилелди иштиракзава. 2016-йисуз ва адалай гуьгъуьнин йисарани мини-футболдай райондин кIвенкIвечивилин турнирра вичи кIелзавай Ахцегьрин 3-нумрадин ООШ-дин командадик кваз иштиракуналди, ам гьуьрметдин ругуд грамотадиз, медалриз, къиметлу пишкешриз лайихлу хьана.
Шахматрай “Белая ладья” тIвар алай райондин кIвенкIвечивал къазанмишун патал турнирра школайрин командайрин арада приздин чкаяр кьуналди, ам гьуьрметдин грамотайриз лайихлу хьана. Гьамида Ахцегьрин 3-нумрадин школадин общественный уьмуьрдани активвилелди иштиракзава. Предметрин олимпиадайрани ада гъалибвилер къазанмишна.
Ихьтин хва тербияламишзавай адан диде-бубадиз ва тарс гузвай муаллимризни баркалла къвезва. Шаксуз, гележегда Гьамида чун цIийи агалкьунралди шадарда.
Рагьидин Эминов
