ДГПУ-дин къецепатан чIаларин факультетдин 2-курсунин студентка  Етара  Мирзахановадикай,  ингилис чIалай кьиле фейи международный конкурсда гъалибвал къачуналди, Краков шегьердин (Польша) педагогвилин университетда кIелдай мумкинвал гузвай грантдин сагьиб хьанва. Зур йисан вахтунда къецепатан уьлквейрай тир маса студентрихъ галаз санал лезги руша пулсуздаказ ингилис чIа­лай вичихъ авай чирвилер Поль­шадин вузда мадни артухарда.

Етарадин 18 йис я, ам Махачкъалада дидедиз хьана. Ери-бине лагьайтIа, Хив райондин АрхитIрин хуьряй я. Къизилдин медалдалди республикадин меркездин 37-нумрадин гимназия акьалтIарай руша ДГПУ-дин къецепатан чIаларин факультет хкяна. Къейд ийин хьи, гимназияда кIелзавай йисара Етаради музыкадизни итиж ийизвай: ада вокалдин ва фортепианодин классар яру дипломралди акьал­тIар­на. Адахъ гьакI ЭВМ-дин оператордин дипломни ава.

— Заз Урусатда кIелиз кIанзавай, — хиве кьазва студенткади. — Мектебда вири имтигьанрай (ЕГЭ) 90 баллдилай гзаф къазанмиш­натIа­ни, зун диде-бубади патал ахъайнач. Гьелбетда, пулдин месэлани авай. Маса шегьерда кIелун патал кIвал кирида кьуна кIанзава, рекьериз, тIуь­низни пул акъатзава. Диде-буба патал им артухан къайгъударвални жезвай, гьавиляй за жуван гафунал кIевивални авунач. Грант­ди­ зи вилик цIийи рекьер ачухна, заз Европадиз фидай мумкинвал же­да. Эхирни зи мураддиз экуь дуь­нья аквада. Зун и кардал лап шад я.

Етаради педагогдин пеше хкя­гъунихъ себебарни ава: адан саки вири мукьва-кьилийри образованидин хиле кIвалахзава: диде — Бике Мирзаханова, хейлин йисарин тежриба авай филолог, имияр, халуяр, месела, Агъабег Ширинбегович (Хъукьварин хуьр), Сефибег Сефибегов (Кашанхуьр) гьуьрмет, авторитет авай муаллимар я.

— Зи насигьатчи зи чIехи вах Са­мийа Мансурова я, — давамарзава суьгьбет Етаради. — Гимназияда кIел­­завай йисарани ам зи муаллим тир, вири конкурсризни чун санал фе­на. Ам себеб яз заз ингилис чIал­ни муаллимдин пеше кIан хьана.

Етара алакьунар авай руш, еке гележег авай инсан я. Республикада кьиле фейи конкурсрилай гъейри, ада республикадилай къецепата тешкилай мярекатрани иштиракна, кIвенкIвечи чкаярни кьунва. Мисал яз, 2013-йисуз Британиядин Ве­килханади тешкилай, Москвада кьи­ле фейи олимпиадада — 1, “Инги­лис чIалал диктант” лишандик кваз 2017-йисуз кьиле фейи Вирирос­сия­дин конкурсда 2-чкаяр кьуна.

Аферин! Етарадихъ мадни еке агалкьунар хьун чи мурад я.

Агьмед Магьмудов