Дагъустанда эхиримжи йисан къене банкарин терминалрин ва банкомат­рин кьадар 40 селемдин (процент) артух хьанва. Идакай «Лезги газетдиз» РД-дин Кьилин пресс-къуллугъди хабар гана.

9-июндиз Сергей Меликова Россиядин Банкдин Кьиблепатан Управленидин начальник Евгений Эберенцахъ ва финансрин «Мир» къурулушдин векилрихъ  галаз гуьруьш кьиле тухвана. Абуру рес­публикадин мулкара, дагълух районра, яргъал тир хуьрера финансрин къуллугърикайни сервисрикай менфят къачунин программадин мумкинвилер артухарунин месэлаяр веревирдна.  Гуьруьшдал платежрин къурулуш базаррал, мекерайрал (ярмарка), туриствилин объектра ва мектебрани хьунин мумкинвилериз килигна.

Республикадин мулкара авай банкариз гьукумдин муниципальный дережадин органрихъ галаз санал агьалияр патал финансрин къуллугърикай менфят къачудай алава мумкинвилер арадал гъун теклифнава. Мисал яз, банкарин алава терминалар, муьштерияр патал QR-кодар кардик кутун ва масабур.

2025-йисан 1-апрелдин делилрал­ди,­ Дагъустанда 17,7 агъзур терминални бан­комат кардик кутунва. Йисан къене абурун кьадар 41 процентдин артух хьана. Юкьван гьисабдалди 1000 касдал 5 терминал ацалтзава.

Банкарин картайрай пул къачунин мес­эла иллаки дагълух районрин агьалияр патал четин месэладиз элкъвенва. Хуьрера терминалар, банкоматар авачирвиляй гзафбур пул къачун патал патарал финиз мажбур жезва. Терминалрин, банкоматрин кьадар артух хьанайтIа, шак алачиз, жемятдизни регьят жедай.

Чи мухбир