Статистикадин делилри шагьидвалзавайвал,  зулунни хъуь­тIуьн вахтунда иллаки яшайишдин кIвалера цIаяр кьунин дуьшуьшар гзаф жезва. Кьилин себебни-мукъаятсузвал…

Мекьи хьайивалди, агьалийри электрикдин пичериз худ гун адетдин кар я. Амма пичер ва электропроводка ахтармишуниз, бязи дуьшуьшра пичер хейлин йисара ишлемишуникди куьгьне хьуниз фикир гузвач. Не­тижада цIаяр кьунин дуьшуьшар арадал къвезва. Идалайни гъейри, сир туш хьи, чIехи пай кIва­лера электрикдин проводка лазим гьалда авач. И кар замыкание хьуникди цIай кьунал гъунин кьилин се­бебрикай сад я.

Мадни яшайишда электрикдин тадаракар иш­лемишдайла цIаяр кьуникай хуьнин къайдайрал амал тавуник­дини хаталу дуьшуьшар арадал къвез­ва. ЦIаяр кьуниз акси гьалар, зулунни хъуьтIуьн вахтуниз агьалияр гьикI гьазур хьанватIа ахтармишунин макьсаддалди, цIаяр кьунин ва абурун нетижада инсанар  кьини­кьал гъунин дуьшуьшрин вилик пад кьуниз талукьарнавай серенжемар кьиле тухузва. Аялар авай хизанриз, текдиз яшамиш жезвай ва инвалид ксариз артух фикир гузва. И кIва­лахдал къенепатан крарин органрин, яшайишдин рекьяй куьмекдай, гьакIни чирвилер гудай идарайрин къуллугъчияр желбнава. Абуру агьалийриз вахтунда чпин кIвал, чимивал гудай тадаракрин (пичинин, гурмагъдин…) гьал  ахтармишуниз, лазим атайла, абур ремонтуниз, гьакIни гурмагъ би­пIинрикай михьуниз эвер гузва.

Пичера цIаяр хъувуналди кIвале­риз чимивал гузвай агьалийрин фикир мадни ихьтин крарал желб ийиз кIан­зава: эгер пичинин вилик кIарасдин ва я кун мумкин тир маса материалдин пол кватIа, анал (0,5 х 0,7м. кьадардин) кун тийидай чар экIя­гъун хъсан я. Пи­чинин винел ва патаривни чуьхвей шейэр кьурурна виже къведач… Мадни, изо­ляция алатнавай проводка ва кабель, къайдадик квачир ро­зеткаяр, рубильникар ва икI мад иш­­леми­шун къадагъа я.

Ида­лайни башкъа, электрикдин са шу­муд тадарак са розеткадик кутуна, идалди электросетдал гуж акьулдна виже къведач. Электрикдин тадарак кун тийидай материалдин подставкадал эцигна кIанда.

РикIел хуьх: яшайишда анжах заводра гьазурнавай тадаракрикай менфят къачун лазим я. Абур ишлемишдалди вилик ин­струкциядихъ галаз таниш хьухь!

Р.Султалиев, Махачкъала шегьерда авай 1-нумрадин ОНД-дин ва ПР-дин старший инспектор