И мукьвара СтIал Сулейманан райондин КIварчагърин хуьруьн культурадин кIвале, шаир Абдурагьман Межидован 90 йисаз бахшна, “Муьгьуьббатдин дуствал хвейи шаир” лишандик кваз, яратмишунрин мярекат кьиле тухвана.

Мярекат культурадин кIвалин регьбер, Абдурагьман Межидован рикI алай дуст Зейнуллагь Навру­зова ачухна, “Сулейманан багъдин билбилдин” уьмуьрдикай доклад авуна. Анал А.Межидован уьмуьрдикай итижлу делилриз талукь суьгь­бетар авурбурун арада культурадин кIва­лин общественный советдин член З.Юзбегова, шаир В.Насруллаева, муаллим К.Абдулмежидовани авай.

Культурадин кIвалин гьевескар артистри гьазурнавай программа А.Межидован “Мамлакат” манидилай башламишна. Гьар са нумра кIватI хьанвайбуру гурлу капар ягъу­налди къаршиламишна.

Мярекатдал КIварчагърин М.Къа­раханован тIварунихъ галай юкьван мектебда кIелзавай аялри — П.Абдуллаевади, Н.Мегьтиева, А.Наврузовади, И.Бабаева, Ж.Насрулаевади, М.Абасовади Абду­рагьман Межидован “Зи гъвечIи дустариз”, “Зегьмет”, “Бахтунин ре­кьера”, “Шаирдин пеше”, “Алуддач за ри­кIелай” шиирар ва Зейнуллагь Нав­рузова юбилярдиз бахшна кхьенвай тебрик устадвилелди кIелна.

Чи мухбир