И йикъара чав Москвадай шад хабар агакьна: 26-28-февралдиз меркезда кардик квай уьлкведин хайи чIаларин муаллимрин ассо­циацияди са жерге маса тешкилатрин куь­мек­далди дидед чIалан Международный йи­къаз талукьарнавай форум кьиле тухвана.

Мярекатда иштиракай Сулейман-Стальский райондин Герейханован хуьруьн Р. Османован тIварунихъ галай юкьван мектебдин дидед чIалан муаллим Шамсудин Магьамдарова Урусатдин Общественный палатада кьиле фейи семинарда ва “элкъвей столда” “Потенциал культуры в популяризации родного языка”, “По реализации концепции преподавания родных языков народов РФ” темайрай докладар авуна.

Форумдал модератордин везифаярни чи ватанэгьлидин хиве тунвай. Яргъал йисара хайи чIалан жигьетдай таблигъат тухузвай, ам хуьник лайихлу пай кутазвай, датIана лезги чIалаз талукь мярекатра иштиракзавай Шамсудин Магьамдаров сертификатдиз ва “За вклад в сохранение и развитие родного, в том числе русского, языка” медалдиз лайих­лу хьана. Им ада галатун тийижиз чIугвазвай зегьметдиз ганвай чIехи къимет я.

“Лезги газетдин” редакциядин коллективди Шамсудин муаллимдиз и чIехи агалкьун мубаракзава.

Шамсудин Магьамдаров Вирироссиядин “Милли чIалан хъсан муаллим — 2013” конкурсдин гъалибчи, РД-дин лайихлу ­муаллим, РФ-дин умуми образованидин гьуьр­метлу работник, РД-дин образованидин отличник я. Адакай гегьенш макъала газетдин къведай нумрада чапда.

«Лезги газет»