18-декабрдиз Махачкъалада, шадвилерин “Сарыхум” залда, республикадин СМИ-ра кIвалахзавай са десте журналистрив РД-дин Кьилин 2019-йисан 20-августдин Указдалди “Международный бандформированияр кукIварайдалай инихъ 20 йис” — мукьвара тестикьарнавай медаль вахкунин мярекат кьиле фена.
И награда журналистриз абуру 20 йис идалай вилик, 1999-йисан август-сентябрь варцара, чи республикадал чапхунчивилелди атай бандитрин международный кIеретIар чукурдайла, массовый информациядин такьатралди, чпин хци гафуналди халкьдив дуьз ва гьакьван герек информация агакьарунай, халкьдин ополченида активвилелди иштиракунай ганва.
Чи редакциядай и наградадиз тежрибалу журналистар — РФ-дин ва РД-дин культурадин лайихлу работникар, яшайишдинни чарарин отделдин виликан редактор Алаудин Халидович Гьамидовни литературадин отделдин редактор Мердали Абдулазизович Жалилов лайихлу хьанва.
ЦIийи йисан суварин вилик хьанвай и агалкьун чи чIехи юлдашриз чна рикIин сидкьидай мубаракзава. Къуй куь къелемар мадни хци, дуьнья — ислягь, уьмуьр бахтаварди хьурай!
“Лезги газетдин” редакциядин коллектив.
