Кьиблепатан Дагъустандин жуьреба-жуьре районрай, хуьрерай «Лезги газетдин» редакциядихъ галаз фадлай алакъаяр хуьзвай мухбирар тIимил авач. Ахьтинбурукай сад СтIал Сулейманан райондин Курхуьряй тир Райсудин Набиев я.
Лагьана кIанда, Райсудин Набиева газетдиз гьар жуьредин темайрай очеркар, репортажар, зарисовкаяр рекье тунилай гъейри, хайи районда, хуьре газет подписка авунин жигьетдайни еке кIвалах тухузва. Хейлин йисарин тежриба авай пешекар муаллимди вичин ватанэгьлийриз хайи чIал хуьниз эвер гузва ва милли газетар, журналар кхьин, кIелун и рекье кар алай месэлайрикай сад тирди къейдзава.
Саки 60 йисуз акьалтзавай несилриз тербияни чирвилер гайи муаллим Райсудин Набиеван къелемдикай мукьвара нубатдин 10-ктаб хкатнава. «Лезги газетдин» редакциядин коллективди адаз яратмишунрин рекье хьанвай агалкьун мубаракзава ва адахъ чандин сагъвални яргъи уьмуьр хьун алхишзава.
Редколлегияди гьакIни хейлин йисара газетдихъ галаз алакъаяр ва хайи чIал хуьнин, вилик тухунин рекье чIугунвай зегьметдай Райсудин Набиеваз «Лезги газет» — 100 йис» медаль гудай къарар кьабулнава. Мубаракрай!
«Лезги газет»
