24-ноябрдиз СтIал Сулейманан район­дин КIварчагърин хуьре кардик квай Гь. Аллагьвердиеван тIварунихъ га­лай­ бокс вилик тухудай центрада жегьилрин арада какахьай единоборст­войрай (ММА) республикадин турнир кьиле фена. Адан тешкилатчияр Кас­пийск шегьердин собранидин депу­тат Абдулвагьид Жаватов ва грэпп­лингдай дуьньядин чемпион, Дагъус­тандин боксдин федерациядин советник  Явер Межидов тир.

Турнирдин бягьсериз тамашиз, КIвар­чагъ дередиз багьа мугьманарни атанвай. Кьилди къачуртIа, абурун арада райондин кьил Саид Темирханов, министрар тир Заур Эминов (Да­гъустандин чилерин ва эмен­нидин алакъайрин) ва Энрик Муслимов (Дагъустандин милли ­по­литикадин ва динрин кра­рин), республикадин парламент­дин депутатар, общественный тешкилатрин векилар ва масабур авай.

Турнир ачухуниз талукьарнавай шад мярекатдал жегьил спортсменрин тIва­рунихъ С. Темирханова, А. Жаватова, З. Эми­нова чими келимаяр ла­гьана, чпин агалкьунралди абуру инлай кьулухъни шадардайдан патахъай умудлувал къалурна.

— Балаяр! Къенин турнир куьне пешекарвилин спортдиз къачузвай сифте­ кам я. Гьар сад республикади дамахза­вай кьегьалар яз, гъалибвилер къазанмишун патал чалишмишвилерилай куь гележегдин агалкьунарни аслу жеда. Спортди куь неинки беден къуватлу ийизва, гьакI къилихни мягь­кемарзава, че­тинвилериз дурум гуз ва макьсаддив агакьариз чирзава. Спортдин менфятлу ихьтин серенжемра иштирак авуналди, куьне, алакьунар, устадвал къалурунихъ галаз сад хьиз, тежрибани хкажзава. Квехъ вири рекьерай агалкьунар хьурай! — алхишна Саид Темирханова.

Мярекатдин сергьятра аваз, турнирдин тешкилатчийри районда спорт ва физический культура вилик тухунай Саид Темирхановав Чухсагъулдин чар  вахкана.

Хъсан тешкиллувални гьазурлухвал аваз кьиле фейи турнирда Дагъустандин жуьреба-жуьре районрайни шегьеррай тир 100-далай виниз жегьил спортсменри­ чпин устадвал ва алакьунар къалурна­. Гуьгъуьнлай пешекаррин арадани 4 бягьс кьиле фена. И юкъуз КIварчагъ дередин­ агьалийриз ва мугьманриз яргъалди ри­кIел аламукьдай легьзеяр багъишна.

ИкI, къизгъиндаказ кьиле фейи бягьсерин нетижада гъалибчиярни майдандиз акъатна. Абуруз турнирдин тешкилатчийри кубокар, медалар, грамотаяр ва пишкешар гана.

Рагнеда Рамалданова