Шагьмурад Селимов
1920-йисуз Хив райондин Цналрин хуьре урта лежбердин хизанда дидедиз хьана.
Сифте чирвилер ада хуьруьн медресада, гуьгъуьнлай Ахчани хуьруьн сифтегьан школада къачуна. 7-класс Цмуррин хуьруьн школада куьтягьна. Гуьгъуьнлай Дербентдин педтехникумдин курсара кIелна, хайи хуьруьн мектебда муаллим яз кIвалахна.
Ибур дяведилай вилик квай четин йисар тир. Шагьмурад эвленмишни хьанвачир. Гитлеран чапхунчийри чи Ватандал хабарсуз вегьейла, вири халкь душмандихъ галаз дяведиз къарагънай. 1942-йисан февралдин вацра Селимов Шагьмурадни Яру Армиядин жергейриз гуьгьуьллудаказ фена.
Жегьил муаллимди кьуд вацра танкистар гьазурдай училищеда чирвилер къачуна. Инаг куьтягьай красноармеецди танкарин 46-нумрадин полкуник кваз душмандиз ягъунар кьуна, Кавказ, Поволжье фашистрикай азадна.
Къати женгера хирер хьайи Селимов Шагьмурад 1943-йисан ноябрдин вацра Яру Армиядин жергейрай хуьруьз хтана.
Дяведа къазанмишай агалкьунрай адаз Ватандин ЧIехи дяведин 2-дережадин орден, Жукован, Невскийдин ва юбилейрин медалар, грамотаяр гана.
Дяведилай гуьгъуьниз Селимов Шагьмурада Хив райондин закатконторада директор, Цналрин Ф.Энгельсан колхоздин председатель яз кIвалахна.
Уьмуьрдин эхиримжи йисара ада Цналрин хуьруьн юкьван школада завхозвиле зегьмет чIугуна.
Мегьамед Мегьамедтагьиров
Кьурагь райондин Хуьрехуьре 1922-йисан 20-октябрдиз кесиб лежбердин хизанда дидедиз хьана.
Дербентдин педучилище куьтягьайдалай гуьгъуьниз ада хайи хуьруьн школада муаллим яз кIвалахна.
Дяве башламишай сифте кьилера ада фашистрихъ галаз женг чIугуна. Ахпа ам Тифлис шегьердин артиллеристрин училищедиз кIелиз ракъурна.
1943-йисан майдиз ам артиллеристрин взводдин командирвиле тайинарна.
Мегьамед Тагьировича Ватан душмандикай азадна ва Польша патални дяве тухвана. Ада Ватан маса гайи генерал Власован хаинар терг авунин женгерани иштиракна.
Дяведин йисара фашистрихъ галаз тухвай женгера къалурай гьунаррай ам Ватандин ЧIехи дяведин 2-дережадин ордендиз, “Женгерин лайихлувилерай”, “Германиядал гъалиб хьунай” медалриз хейлин грамотайриз лайихлу хьана.
1957-1971-йисара ада МВД-дин органра къуллугъна. 1971-1979-йисара М.Мегьамедтагьирова Дербент шегьердин 9-нумрадин юкьван мектебда военрук яз кIвалахна.
Р.Велибегов
