Гьеле колхозар тешкил жедалди, Алкьвадрин сергьятдилай гатIунна, Вини СтIалрин багъларив кьван Курхуьруьн жемятрин багълар экIя хьанвай. Абуру 400 гектардилай артух майданар кьунвай. А вахтара, гила хьиз, багъларал цацарин, сеткайрин, тIваларикай хранвай жугъунар элкъуьрнавачир. Инсанриз сада масадан чкадай емишар, векьин кIемер чуьнуьхун чидай крар тушир. КIвале-кIвале берекатар, гьуьрмет-хатур артух тир.
Чка-чкадал талукь ксарин тIварарни алай. Месела, “Алхасан векь”, “ВацIаллай чкаяр”, “Ажмекендаран чка”, “Мустафадин чка”, “ПIасан чка”, “Къазибеген чка” ва икI мад. Ихьтин тIварар 275 чкадал алай. Гьарда, лап яргъарай, гьатта Азербайжандайни гъиз, къелемар акIуриз хьанай. Нетижада анра Анар чIахмаяр, КIварчагъ, Куч сортарин ичер, Ирандин къайси машмашар — саки вири емишар авай, гила хьиз, кьуд-вад сорт ваъ.
Колхозар тешкилай йисалай совхоз жедалдини, и багълари халкьдиз къуллугъна. Давудан муькъуьн сивелай Алкьвадрихъди “Тарикъулидин векь” тIвар алаз еке багъ экIя хьанвай. Инай “Тум какур”, “Цил авачир”, “Шурван”, “Кьиф” сортарин чуьхверрин еке бегьерар къачузвай. А багъ башламиш жезвай чкадал верчерин ферма, яшамиш жедай кIвалерни алайди тир. Вичин девирда диндин месэлаяр раиж ийизваз акуна, анал кIвалахиз хьайи Абдулагь фекьи суьргуьндиз акъуднай. Вахт акьалтIайла, ам хуьруьз хтанай ва ада виликан фермадал вичин кIвалах давамарнай.
Адан хизанда Наметулагь тIвар алай ругул аял чIехи хьана. Вичин вахтунда Абдулагь фекьиди гададиз мусурманвилин адетар, капI-тIятдин гафарни къайдаяр чирна. Адав педучилищени куьтягьиз туна. Сифте классрин муаллим яз кIвалахзавай Наметулагьаз, Ватандин ЧIехи дяве башламиш хьайила, армиядин жергейриз эверна. Сифтедай ам 191-нумрадин стрелковый полкуниз акъатна. Ина ада Курский къекъуьндин кар алай чка кьаз алахъай немсерихъ галаз къизгъин женгера иштиракна. Вири къуватар эцигна, душмандин вилик пад кьуна. Наметулагьани масадбурухъ галаз активвал, викIегьвал къалурна, патарив гвай маса чкаярни душмандикай хвена. Адаз сержантвилин чин гана, отделенидин командирвиле тайинарна. Отделениди командиррин са шумуд тапшуругъ кьилиз акъудна.
Хуьруьз ам дяведин эхирра хтана. Къалурай викIегьвилерай сержант Наметулагь Абдулаев Жукован, “Германиядал гъалиб хьунай” медалриз лайихлу хьана. Дяведилай гуьгъуьнин йисара ада сифтегьан классрин муаллимвиле кIвалахна.
Райсудин Набиев
