Дагъустандин гьукумдарар Херсондин областдиз хуьруьн майишат еримлу авунин рекьяй тежриба чириз ва аниз хуьруьн майишатдин суьрсет агакьариз гьазур я. РД-дин Гьукуматдин пресс-къуллугъди хабар гузвайвал, идан гьакъиндай Дагъустандин премьер-министр Абдулмуслим Абдулмуслимов Херсондин областдин губернатор Владимир Сальдодихъ галаз Петербургдин вири халкьарин экономикадин форумдин (ПМЭФ) майданрал кьиле фейи гуьруьшдал икьрар хьана. Кьве терефди промышленностдин, медениятдин ва спортдин хилерай алакъалувилелди кIвалахунин месэлаяр веревирдна.
Ихтилатар кьиле фейи вахтунда А.Абдулмуслимова тестикьарна хьи, яшайишдинни экономикадин вири хилерай еримлу авунин жигьетдай республика саналди кIвалахиз гьазур я.
ПМЭФ-да иштиракай Дагъустандин дестеди чи республикадин хуьруьн майишатдин суьрсет гьялунихъ галаз алакъалу инвестицийрин месэлаяр къарагъарна. И кардикай РД-дин Кьил Сергей Меликова Халкьдин Собранидиз рекье тур Чарчени лагьанва.
«Лезги газет»
