Чи ватанэгьлияр — гьар сана
Мукьвара зун интернетдин куьмекдалди Москвада яшамиш жезвай чи ватанэгьли Эмил Гаратовахъ галаз таниш хьана. Ада Москвада, метродин “Беляево” станциядин мукьув, “Лекия” тIвар алай туьквен кардик кутуна, анай лезгийрин милли хуьрекар ва Дагъустандин лезетлу суьрсетар маса гузва.
Эмила ихтилатзавайвал, “Лекия” туьквендин муьштерияр асул гьисабдай лезгияр я. Амма лезги тIуьнрин, иллаки афаррин тIям чир хьайи урусрини мукьвал-мукьвал туьквендихъ гьерекатзава. Мугьманриз ана ацукьна фу недай мумкинвални ава.
Гаратов Эмил Абиловичан ери-бине КцIар райондин ЭчIехуьряй я. Ина ам 1989-йисуз дидедиз хьана. Адан кьве варз тамам хьайила, хизан Москвадиз куьч хьана. ГъвечIи чIавалай чIехи шегьерда яшамиш хьанатIани, Эмила гьамиша милли адетрихъ, ивиррихъ ялзава, адавай михьидаказ лезги чIалал рахазни жезва.
Э.Гаратова 2010-йисуз Москвада экономикадинни праводин академиядин уголовный праводин факультет куьтягьна. Гуьгъуьнлай ада алишверишдихъ галаз алакъалу жуьреба-жуьре кIвалахарни кьилиз акъудна. Евразиядин деловой союзда кIвалахдайла, ада Карачаево-Черкесия республикадин патай векилвална. Коммерциядин и кIватIалдик Россиядин 52 регион, 30-далай гзаф жуьреба-жуьре уьлквеяр ква. КIватIалдин кьилин макьсад адан вири иштиракчийрин (уьлквейрин) арада алишверишдин алакъаяр хъсанарун, вилик тухун я.
Евразиядин деловой союзди “Дуьньядин туьквенар” тIвар алай дуьньядин дережадин проектдик кьил кутунва. Яни гъвечIи туьквенрай жуьреба-жуьре уьлквейрин суьрсетар маса гузва. И проектдин сергьятра аваз алай вахтунда 20-дав агакьна уьлквейри чпин милли туьквенар кардик кутунва: Италияди, Грецияди, Болгарияди, Египетди, Эрменистанди, Сирияди, Туьркияди, Францияди, США-ди, Кореяди, Индияди, Гуржистанди, Киргизияди, Къазахстанди ва масабуру.
Исятда “Лекия” туьквендай москвавийривай лезги цикIенар, афарар, хинкIал, иситIа, хьран фу, шурва, чIахарин хапIа, алуга къачуз жезва.
Лезгийриз “Лекия” туьквендикай хабар хьун патал Эмила соцсетра махсус аккаунт арадал гъанва, датIана шикилар, цIийивилер алава ийизва.
“Гележегда чаз лезгийрин тIуьнар машгьуриз кIанзава. Лезгийрин афарар, цикIенар брендриз элкъуьрдай фикир ава. Исятда чаз саки гьар са пипIе эрменийрин лаваш, гуржийрин хачапури, абхазрин гьажикIа аквазва. Амма чна, лезгийри, вилаятда машгьур халкь яз, чи милли ивирар раижзавач. Чахъ машгьур карчияр, еке мумкинвилер авай ксар гзаф аватIани, ихьтин крара чна зайифвални кагьулвал къалурзава. Ихьтин крарик кьил кутуникай фикирзавайбур авач”, — лугьузва Эмила.
Жергедин жегьил агьали ятIани, Эмил Гаратова лап важиблу месэла гъиле кьунва. Къуй чи ватанэгьлидихъ и рекье еке агалкьунарни мумкинвилер хьурай!
К.Ферзалиев
