Белиж поселокда «Ширван» ООО кардик кваз гзаф йисар я. Карханадилай кIвалах хъсандиз тешкилиз алакьнава. Анин коллективдиз ва рабочийриз хъсан шартIар яратмишнава. Нисиниз абуруз чими тIуьн чкадал пулсуз гузва. Сезондин вахтунда 50 касдикай ибарат кIвалахдай коллектив арадал гъанва.
И йикъара чун «Ширван» ООО-диз мугьман хьана. Карханадин генеральный директор Алмаз Османович Абдулгъаниева чун хушдаказ кьабулна ва алатай йисан кIвалахдин нетижайрикай суьгьбетна.
Белиж поселокда мижеяр хкуддай «Ширван» кархана 2011-йисуз ачухна. Тадаракар гъана, цех кардик кутуна, жуьреба-жуьре мижеяр акъудиз гатIунна. Къапарин патахъай кьитвал авачир. Дизайн иердиз туькIуьрна. И йисара кархана яваш-яваш виликди физ гатIунна. Алай вахтунда карханадихъ машгьур хьанвай са шумуд бренд ава. 11 жуьре емишрикай мижеяр ва компотар гьазурзава. Таза емишрикай хкудзавай мижеяр лап менфятлубур яз гьисабзава. Абуруз шекер ягъун герек къвезвач. Абур диабет азар авайбуруз менфятлу я. Ужуз маса гудай ширеярни гьазурзава.
«Ширван» ООО Дербент районда авай емишрин консервияр гьазурзавай тек са кархана я. Компанияди региондин конкурсра иштиракзава. Са шумудра «Экспортер года» конкурсда шабагьриз лайихлу чкаяр кьуна. Карханадин суьрсет Россиядин регионрин агьалийри рикI алаз ишлемишзава. Им чпин везифаяр гьакъисагъвилелди тамамарна, суьрсет ерилуди хьунал гуьзчивалзавай вини дережадин пешекарар — кьилин инженер Сиражудин Абдулгъаниеван, технолог Жейран Гьажиевадин ва заказчикрив вахтунда суьрсет агакьарунал гуьзчивалзавай бухгалтер Сюзанна Бабаевадин зегьметдин нетижа я.
2024-йисуз карханади 150 агъзур путулка компотар, 1 литрдин 400 агъзур мижеяр ва 0,5 литрдин 500 агъзур путулка мижеяр гьасилна.
Карханади СтIал Сулейманан, Мегьарамдхуьруьн районра хсуси емишрин багълар авай арендаторрихъ, кьилдин ксарихъ галаз икьрарар кутIунна, емишар кьабулзава. Къаякентдин чехирар хкуддай заводдай ципицIрин гьазуран шире къачуна, хкизва.
Россиядин шегьерра ва чкадални муьштерияр гзаф ава. Шуьшедин къапара авай мижеяр, кьилдин ксари хьиз, гьакI мехъеррин суфрайрал эцигун патални къачузва.
– Алмаз Османович, алатай сеферда куьне цех гегьеншардай фикир авайдакай лагьанай. Мурад кьилиз акъудиз хьанани? — хабар кьуна за.
— Чун карханади кIвалахзавай гьалдилай рази я. Мижеяр 0,5 литрдин путулкайриз цадай цIийи линия кардик кутунва. Санлай къачурла, чна гьар йисуз миллиондилай гзаф кьадарда аваз 0,5, 0,7 ва са литрдин путулкайра авай суьрсет акъудзава. Производство гегьеншарайла, чаз гележегда кьве миллион путулкадилай гзаф мижеярни компотар гьасилдай мумкинвал жеда. Чна алай вахтунда кIвалахзавай тадаракар куьгьнебур, Советрин Союздин вахтунинбур я. Алай аямдин тадаракар къачун патал чаз гьукуматдин патай куьмек герекзава.
– Гьихьтин куьмек?
— Инвесторрин къуват. ЦIийи технологийрин тадаракар. Гьукуматдин векилри чаз лазим тир тадаракар лизингдай гун ва икI мад. Саудрин Аравиядин, Къазахстандин, Узбекистандин инвесторрин компанийрин, фондарин векилрихъ галаз Махачкъалада кьиле фейи гуьруьшра чнани иштиракна. Чи хьтин гъвечIи карханайриз абуру итиж ийизвач. Абурун иштагьар пара чIехибур я — зурба инвестпроектар кIанзава.
– Квевай сезондин вахтунда гьасилай суьрсет маса гуз жезвани?
— Чна Москвада, Санкт-Петербургда, Краснодарда, Пермдин крайда ва масанрани авай дилеррин компанийрихъ галаз низ гьихьтин емишрин гьикьван мижеяр, гьихьтин емишрин гьикьван компотар ва гьихьтин къапара аваз кIан ятIа къалуриз, санал кIвалахдай икьрар кутIунзава. ЦIийи сезондиз гьасилзавай суьрсертдин кьадарни чна гьа компанийрин заказриз килигна гьазурзава, абурув агакьарзава. Идалайни гъейри, алишверишдин бязи чIехи компанийрин заказралди чна абуруз кIандай тIварар алаз ширеярни компотар гьасилзава. Амукьдай шей жезвач. Гьелбетда, план туькIуьрдайла, абурулай гъейри, чна чкадин агьалийрин игьтияжарни фикирда кьазва.
Къагьриман Ибрагьимов
