(Эвел — 43-44-нумрайра)
* * *
Яргъал вахтунда (1994-2017-й) кьилин редактордин заместителвиле гьакъисагъвилелди зегьмет чIугур, 2018-йисалай инихъ газетдин жавабдар секретарь Шихмурад Шагьэмирович Шихмурадов милли журналистикадин дибар дериндай чизвай тежрибалу муаллимрикай, алимрикай, публицистрикай сад я. Шаз октябрдиз ада вичин публицистикадин лап хъсан ктаб — “Кетин дагъдин ценерив” — чапдай акъудна, кIелдайбурув агакьарна. Газетдиз адан рехъ гьихьтинди хьанатIа, чун идалай вилик раханва, гьавиляй инал мад сеферда тикрарзавач.
Журналиствилин рекье адан зегьмет РД-дин культурадин лайихлу работникдин тIвар, Дагъустан Республикадин гьуьрметдин грамота ва гзаф маса шабагьар гуналди къейднава.
* * *
Лап вини дережадин журналистрикай, тешкилатчийрикай сад газетдиз таржумачивиле атай, ина жавабдар секретардин къуллугъдал кьван хкаж хьайи, гила культурадин отделдин редактордин везифаяр тамамарзавай, гьа са вахтунда кьилин таржумачини яз амай РД-дин культурадин лайихлу работник, хейлин маса шабагьринни сагьиб Даир Бейбалаевич Бейбалаев я. Ада вичелай вилик таржумачивиле ва жавабдар секретарвиле кIвалахай Ноябрь Ханкишиеван, Манучар Яралиеван, Къурбан Къадирован, Агъариза Саидован хъсан ирс цIийи шартIара давамарзава, жегьил къуватар тербияламишзава.
Ахьтинбурукай сад таржумачивиле чи редакциядиз алатай асирдин 90-йисара атай, гила секретариатдин кьилин корреспондент тир РД-дин культурадин лайихлу работник Шагьисмаил Мирземетович Гьажимирзоев я. Ада газетдин ери хъсанаруник лайихлу пай кутазва. И йикъара Ш.М. Гьажимирзоева — Сад лагьай Бахцугъвиди кIелдайбуруз вичин публициствилин хъсан савкьат “Я чан чидайди!..” ктаб багъишна. Им бес тебрикдай кар тушни!..
* * *
Газетдин политикадин отделдин редактор, машгьур писатель, публицист, РД-дин культурадин лайихлу работник Нариман Меликович Ибрагьимов гзаф терефрин ва гьакьван бегьерлу авторрикай сад я. Адан гъиликай Кьурагь, Сулейман-Стальский районрин тарихдиз талукь, илимрин доктор Идрис Абдуллаевич Оружеван, манидар, Дагъустандин халкьдин артистка Сулгьият Гьажиевадин, лезгийрин ва Дагъустандин классикар тир Кьуьчхуьр Саиданни Хпеж Къурбанан гьакъиндай, мад ва мад маса ксарикай лап хъсан ктабар, халисан монографияр, гьикаяйринни повестрин чIехи кIватIалар хкатнава. Ибур мегер квахьдай гелер яни!
Алай вахтунда ада цIийи къуватриз вичин тежриба чирзава. Лезги жегьил, чебни чи Ватандин жуьреба-жуьре пипIера яшамиш жезвай писателриз къаюмвалзава. “Булах” кIватIалди гзаф стIалар санал агудзава. Им тарифдай кар я…
* * *
Экономикадин отделдин редактор Жасмина Мурадовна Саидова я. ДГУ-дин журналиствилин отделение акьалтIарна, ам редакциядиз атана. Са куьруь вахтунда ада вич кардин устад, бажарагълу пешекар тирди субутна. Таржумачивилелай ам отделдин редактордин къуллугъдал хкаж хьана. Ада экономикадинни яшайишдин, хуьруьн майишатдинни промышленностдин хилерай карчивилелди кхьизва, чи кIелзавайбуруз “базардин экономика”, “бизнес” вуч ятIа чирзава…
* * *
Яшайишдинни чарарин отделдин редактор Рагнеда Самедовна Рамазановани, ДГУ-дин филфак акьалтIарна, редакциядиз кIва-лахал атанвай журналист я. Ада милли журналистикадал ашукьвал жуьреба-жуьре отделра бажарагълудаказ кIвалахуналди, девлетлу материалар кIватIуналди, чи культурадин, адетрин тарихдай таъсирлу материалар кхьиналди субутнава. Вичин алакьунар, чирвилер, тежриба генани девлетлу ийизва.
* * *
Газетдихъ тежрибалу, къуватлу хсуси мухбирарни ава. РД-дин культурадин лайихлу работник Демир Шерифалиевич Шерифалиев, чина кIвалахай адан хва Эмираслан Шерифалиевни бажарагълу журналистар я. Гила ам маса кIвалахал фенва.
РД-дин искусствойрин лайихлу деятель Къагьриман Меликович Ибрагьимов, РД-дин культурадин лайихлу работник Абдулафис Мафрудинович Исмаиловни гьа жергедай я.
(КьатI ама)
Мердали Жалилов
