25-октябрдиз Кьурагьрин 1-нумрадин юкьван школада “ЧIехи жедай чка” центр ачухунин шад мярекат кьиле фена. Ана “Кьурагь район” муниципалитетдин кьил Замир Азизова, образованидин отделдин начальник Рамазан Катибова, райондин физкультурадин, спортдин ва жегьилрин крарин рекьяй отделдин начальник Рамиз Рамазанова иштиракна.
— “ЧIехи жедай чка” центр ачухунин кьилин макьсад хуьруьн школайра аялриз девирдин истемишунрив кьур шартIар тешкилун ва абуруз дурумлу чирвилер къачудай мумкинвилер гун я. Ша, буюр, аялар, чи центрадиз, дерин чирвилер къачуз, — къейдна мярекат ачухай школадин директор Гьамид Мисриева.
— Гьуьрметлу аялар, тешкилзавай вири къулай шартIар, квез гьам хуьре, гьамни шегьерда чирвилер къачун патал сад хьтин мумкинвилер яратмишун патал я. Школа гьихьтинди хьайитIа, хуьруьн, райондин ва республикадин агьалийрин гележегни гьахьтинди жеда. Аялар, квехъ кIелунра еке агалкьунар хьун чи мурад я, — лагьана гуьгъуьнлай рахай Замир Азизова.
Яру лент атIуналди, “ЧIехи жедай чка” центрадин ракIарар ачухна. Школадин чIехи классра чирвилер къачузвай аялри мярекатдин мугьманриз центрада авай 3D-айнаяр, интернет-алемда сейр ийидай бармак (шлем), 3D-принтер, квадрокоптерар, интерактивный доска, ноутбукар, цIийиз акъатнавай жуьредин “Сanon” фотоаппарат, шахматар ва маса тадаракар къалурна.
Дугъриданни, центрадин кьве кабинетни лап хъсан ремонт авуна, алай аямдин техникадалди тадаракламишна туькIуьрнава. Къуй гьар са аялдихъ дерин чирвилер ва чандин сагъламвал хьурай!
ПатIимат Магьармова
