30-июлдиз мергьяматлувилин­ «ЛЕКИ» фондуни Мегьарамдхуьруьн райондин админист­рациядихъ галаз санал гьуьл галай патахъай Самурдин тамун къерехда авай мулкара субботник кьиле тухвана. Ана муниципалитетдин админист­рациядин, жемиятдин тешкилатрин, СМИ-рин векилри, тамуз мукьва авай са жерге хуьрерин кьилери, чкадин агьалийри, тамухъанри ва масабуру иштиракна.

Михьивилер авунин мярекат гатIундалди вилик фондунин векил Руслан Мегьтиханова ихьтин мярекатар гьар са хуьре, гьар са районда тешкилунихъ еке метлеб авайди къейдна. «Михьивал чи диндин са пай я, чун элкъвена кьунвай тIебиат михьидаказ хуьн лагьайтIа, – чи виридан умуми буржи. Им чи хайи чил я, адан къайгъу чна чIугуна кIанда. Эдебдин, ахлакьдин ивирар къени крарин заминвал я, чи чIехи бубайри тунвай весияр чаз дуьз рехъ къалурзавай лишанар хьиз я. Ша чна вирида абурал амал ийин­», — лагьана ада, иштиракчийрихъ элкъвена.

Мегьарамдхуьруьн райондин кьил Фарид Агьмедован патай адан заместитель Тимур Тегьмезова субботникдиз атанвайбуруз сагърай лагьана. Иштиракчийри кIватIай зирзибил гадарун патал муниципалитетдин кьилин тапшуругъдалди кьве улакь чара авунвай.

Мярекатда 300-дав агакьна инсанри иштиракна ва абуру саки 500 шешелда авай кьван зирзибил кIватIна. Эхирдай спортдин акъажунарни кьиле тухвана. Субботникдин иштиракчияр патал хъсан тIямлу ашни самовардин чай гьазурнавай.

Агьмед Магьмудов