Чилел чпин тIварар ва агалкьунар “къизилдин гьарфаралди” Ватандин тарихда кхьин лазим тир гзаф кьадар инсанри зегьмет чIугвазва. За гьисабзавайвал, ахьтин ксарин кIвалахриз чна лайихлу къимет гун хъсан кар жеда…
Сулейман-Стальский райондин Сардархуьряй тир жегьил Сагьиб Акимович Алимов — эцигунардай материалрин “Трон-Кнауф” компаниядин директор- гьахьтин ксарикай сад я. Хуьруьнвийриз ам гафунални кардал кIеви, хуьруьн гьал-агьвал хъсанвилихъ дегишарун патал вичин къуватар серф ийизвай кас яз чида. ИкI, Сагьиб Алимован алахъунрин нетижада хуьре субботникар кьиле тухудай хъсан адет арадал атана. Хуьруьн кьилин куьчеяр ишигълаван хьана. Санлай 80 агъзур манат харж авуналди, хуьре автобусрин кьве остановка эцигна. Сардархуьре тротуарар туькIуьрун патал са километрни зур мензилдиз чиргъ вегьена гьазурнава. Мадни С.Алимова вичин хайи хуьре алай аямдин вири истемишунриз жаваб гузвай еке спортзал эцигна, ам Сагьиб Алимован чIехи буба, ВОВ-дин ветеран, гъалибвал къазанмишун патал вичин чан гайи Азим Алимован тIварцIихъ янава.
Сагьиб Алимован такьатрин гьисабдай тир дегишвилер хуьре мадни ава. ИкI, 2016-йисан 2-майдиз Сардархуьре аялрин бахча эцигун патал хандакIриз сифте къван вегьиниз талукьарнавай мярекат кьиле фенай. Са куьруь вахтунда бахчадин дарамат хкажна. 2017-йисан 1-сентябрдиз (17 касдиз кIвалахдай ва 60 аялдиз чкаяр авай) и идара ишлемишиз вахкана.
Сагьиб Акимовича хуьруьн школадизни еке куьмекар гузва. ИкI, школа капитальнидаказ ремонтун патал 2015-йисуз 280 агъзур, 2016-йисуз 50 агъзур, 2017-йисуз лагьайтIа, 69 агъзур манат чара авуна.
Махачкъаладин са ресторанда 2017-йисан Сурдлимпиададин къугъунра дзюдодай чемпионвилин тIвар къазан-мишнавай районэгьли, Сагьиб Акимовича эцигнавай спортзалда вичин устадвал хкажай Руслан Аскеров шад гьалара къаршиламишнавай. Спортсмен тебрикиз атанвайбурун арада Сагьиб Алимовни авай. Ада чемпиондив Каспийскдин центрадай кьве кIваликай ибарат квартирадин куьлегар вахкана, адан тренер Тельман Къурбановаз 200 агъзур манат пишкеш яз гана.
Чи мурад Ватан ва ватандашар патал гзаф рикI кузвай Сагьиб Алимовахъ чандин сагъвал, хизанда хушбахтвал ва вилик эцигнавай макьсадар кьилиз акъуддай къуватар хьун я.
Нариман Къарибов
