Алатай йисарив гекъигайла, алай девирда Лезгистандин бязи хуьрер аваданламишунин крар хъсан еришралди кьиле физва. Эхиримжи вад-цIуд йисуз инвесторрин куьмекдалди, гьакI госпрограммайрин сергьятра авазни хейлин хуьрера садрани тахьай шартIарни мумкинвилер арадал атанва: аялрин бахчаяр, спортзалар, цIийи мектебар… Гьелбетда, дагълух районрин хуьрера дуланажагъдин вири жигьетрай гьеле шадвалдай гьалар авач. Рекьера къир авачирвиляй, тIебии газдалди таъминариз тахьанвайвиляй бязи хуьрер девирдин истемишунрилай гуьгъуьна амукьзава…
Шад жедай кар ам я хьи, чна са шумудра къейд авурвал, чпин хайи ерияр аваданламишунин къайгъу чIугваз гьазур тир баркаллу ватанэгьлийри гьар са пипIяй чпикай хабар гузва.
И сеферда зи ихтилат мергьяматлу крар кьилиз акъудзавайбурукай сад тир жегьил карчи, вичин ери-бине Докъузпара райондин Миграгърин хуьряй тир Тарлан Микаилович Исмаиловакай я. Ам 1986-йисан 7-ноябрдиз Бакуда дидедиз хьана. СССР чкIайдалай кьулухъ хизан Дагъустандиз куьч хъхьана.
2004-йисуз Миграгърин юкьван мектеб куьтягьайдалай кьулухъ Тарлан Красноярск шегьердиз фена ва эцигунрин техникумдик экечIна. ВикIегь жегьилди студент йисара “Монолит Строй” ООО-да бригададин начальник яз кIвалахна. 2009-йисуз Москвадиз фейи жегьил карчивилел машгъул хьана. Крар агалкьунралди кьилиз акъудиз эгечIай Тарлана 2012-йисуз Москвада ва Санкт-Петербургда вичин аптекаяр ачухна. Алай вахтунда ам аптекайрин сетдин ва медицинадин косметологиядин центрадин руководитель я. Ада уьлкведин маса регионривни медицинадин затIар, дарманар агакьарзава. Ватанэгьлиди 2018-йисан майдиз импортозамещенидин проект — дарманар арадал гъунин ва чарара тунин завод кардик кутуна.
2016-йисалай мергьяматлувилин кIвалахрал машгъул я. Тарлана пис азаррикди азиятдик квайбуруз алакьдай куьмекар гузва. Ам мергьяматлувилин “Леки” фондунин иштиракчини я.
Ада вичин дагълух ватан тир Миграгърин хуьруьн къенепатан рекьер ремонтна, яд гьатзавай чкаяр туькIуьрна ва икI мад. Идалайни гъейри, куьчейра эквер туна, “Усугъчай-Миграгъ” куьгьне рехъ гуьнгуьна хтуна. И рекье улакьра аваз гьерекатзавайбуру, гьакI вири хуьруьнвийри жемят патал хъсан крар кьилиз акъудай Тарлан Исмаиловаз алхишарзава. 2018-йисан августдиз Къурбанд суварин вахтунда ада хайи хуьруьн агьалийриз садакьаярни пайна.
Къуй Тарланахъ чандин сагъвал ва кIвалахра мадни зурба агалкьунар хьурай!
Куругъли Ферзалиев
