Журналист, публицист, шаир Мердали Жалилова 2018-йис нубатдин «Мешебегидин мани» ктаб чапдай акъудуналди акьалтIарна ва ам Россиядин Игит Зейнудин Батманован кьегьалвилиз бахшнава.

Шаир чи макандин виридалайни гуьзел Самурдин тама гзаф къекъвейди я. Самурдин таму ам вичел акI ашукьарна хьи, шаирди тамукай сад-садан гуьгъуьналлаз манияр теснифна. Эхь, там, тамун алем вири дуьнья, инсаният саламатдиз хуьн лазим я. Таму чаз вири гузва эхир: нефес, яд, гьава, тIуьн, чим… ТIебиатдин ихьтин гуьрчег алемдикай шаирди бес гьикI кхьидач?!

Самурдин сел,

Самурдин там —

Деб хьайибур

Зун паталди.

Дидедин нек,

Бубадин эрк,

Йикъарин экв

Гайибур заз…

Ашукьарай

Зун цаварин

Кагьрабайрал,

Жегьрейрал,

Чилерални —

Пак инжийрин

Зерейрал,

ЖикIийрални

Мерейрал…

Тамукай, адан гуьзел безекрикай, там хуьзвай кьегьал рухвайрикай гьейранвилелди кхьенвай мани сефилдиз куьтягьдай чкадал атана шаир: тамун иесивалзавай ислягь мешебегидин чандиз къаст ийидай кьве кIвач квай вагьшиярни акъатна кьван тамариз. И мусибатди шаир къарсурна, адан ивидал звал гъана. Гьавиляй ихьтин цIарарни арадал атана:

Хуьрни уба къарсурна бед хабарди.

— Игит хцин чандиз къастна мурдарри!

— МуьтIуьгъ хьанач хва зулумдинлабарриз!

— Кьурай ман чеб, душманар,терс азарри!…

Амма накъвар туна дидед вилерал.

Свас, веледар пузгъун хьана кIвалера.

Агь акъатна гьайиф хьайи эллерай:

— Виранар гьикI халкьнатIа чи чилерал?!

Тамукай мани давамаруналди М. Жалилова кIелзавайбуруз Россиядин Игитвилин чIехи тIварцIиз лайихлу хьайи Зейнудин Батманова неинки там, адан девлетар, гьакI чилин винел виридалайни чIехи девлет — инсан хуьнин гьакъикъи рекьер гьихьтинбур ятIа субутайди къалурзава. Вичин чан маса ксарин  уьмуьр хуьн патал къурбанд авун, вагьшийрин вилик ажузвал, юлдашрин вилик хаинвал тавун — идалай чIехи игитвилин чешне женни!

“Мешебегидин манидин” мана: гьар санал таъсиб хуьн, кIеве авайдаз куьмекун, Ватандиз вафалувилелди къуллугъ авун; вагьшийрин хура уьтквемдиз акъвазун ва икI мад. Ктабда гьатнавай “Игитвилин соната”, “Бубадин шинель” поэмайрани гьа и месэлайрикай раханва.

Хийир Эмиров